Sımptomsyz naýqastardyń jaǵdaıyn mobıldi brıgada qadaǵalaıdy
ALMATY. QazAqparat– Almatyda ambýlatorııalyq deńgeıde aýqymdy jumys júrgizilýde. Sımptomsyz naýqastardy mobıldik brıgada qadaǵalaıdy. Bul týraly onlaın brıfıng barysynda qalalyq densaýlyq saqtaý basqarmasynyń basshysy Kamaljan Nadyrov aıtty, dep habarlaıdy QazAqparat tilishsi.
Onyń aıtýynsha, qaladaǵy ár emhanada bekitilgen reglamentke sáıkes patsıentterdi monıtorıngileýmen aınalysatyn mobıldi brıgadalar qurylǵan. Búgingi kúni olardyń sany – 72. Mobıldi toptyń quramyna bólimshe meńgerýshileri, ınfektsıonıst dárigerler, epıdemıologtar, ýchaskelik dárigerler men meıirbıkeler kiredi. Barlyǵy 287 medıtsına qyzmetkeri jumyldyrylǵan.
«Qazirgi ýaqytta qalada ambýlatorııalyq deńgeıde monıtorıngte 2986 adam bar, onyń ishinde sımptomsyz túrimen 2365 adam aýyryp jatyr. Bul - naýqastardyń 79%. 621 adamnyń sımptomdary bar, olardyń úlesi 21%-dy quraıdy. Ambýlatorııalyq deńgeıde sımptomdary bar aýyrlyqtyń jeńil dárejesinde 555 adam – 89%, aýyrlyqtyń ortasha dárejesinde - 66 adam nemese baqylaý júrgizilgen adamdardyń 11%. Sozylmaly aýrýlary bar, táýekel tobyndaǵy 60 jastan asqan adamdarǵa erekshe kóńil bólinýde, qazirgi ýaqytta olardyń sany – 94 adam»,– dedi Kamaljan Nadyrov.
Sonymen qatar, ol dene qyzýy kishkene kóterilgeni úshin mindetti túrde aýrýhanaǵa jatýdyń qajeti joq ekenin aıtty.
«Munda biz vırtýaldy juqpaly aýrýlar aýrýhanasyn ashyp, rastalǵan jaǵdaılarda da, koronavırýstyń yqtımal jaǵdaılary bar patsıentterdiń densaýlyq jaǵdaıyna monıtorıng júrgizýdemiz. Tájirıbe kórsetkendeı, bul jerde eń qıyny - indettiń sımptomsyz nemese jeńil túri bar halyqty úıde otyrýǵa kóndirý. Áıtkenmen statsıonarlardyń tósek-orny tolyp qalýyna baılanysty barsha halyqqa eń aldymen úreıge boı aldyrmaı, bolmashy dene qyzýy aýrýhanaǵa jatqyzýǵa sebep bolmaıtynyn aıtqym keledi»,– dedi ol.
