«Simba» fırmasy kinálaryn moıyndap otyr

Bul jóninde naýryzdyń 4-i kúni Májilis depýtaty Irak Elekeev másele qozǵap, QR Mádenıet mınıstri Muhtar Qul-Muhammed myrzaǵa depýtattyq saýal joldady. Mınıstrden kelgen jaýap hatta depýtattyń usynysyna qoldaý jasalǵan, dep habarlaıdy QazAqparat.

QR Mádenıet mınıstri óz jaýabynda qazirgi tańda memlekettik tildiń qoldaný aıasyn keńeıtýge baǵyttalǵan maqsatty jumystar júrgizilip kele jatqanyn jazady.

«Qazaqstan Respýblıkasyndaǵy til týraly» Zańnyń 21-babyna jáne QR Úkimetimiń 1999 jylǵy 31 tamyzdaǵy № 1274 qaýlysyna sáıkes shetelderde óndirilgen taýarlar men taǵam ónimderiniń taýarlyq japsyrmalary (etıketkalary) memlekettik jáne orys tilindegi aqparattarmen tolyq qamtamasyz etilýi tıis. Bul talap iske asyrylýda.

«Alaıda, Ózińiz kórsetip otyrǵandaı, taýarlardyń qazaq tilinde jazylǵan keıbir ataýlary men málimetteri durys aýdarylmaı, qate jazylý faktileri de kezdesedi. Siz kórsetken faktilerdiń oryn alý sebebin, kinálilerdi anyqtap, zańnama talaptaryna oraı shara qoldaný úshin osy másele quzyretine jatatyn Almaty qalasynyń Til basqarmasyna hat joldandy. Sondaı-aq Almatydaǵy «Simba» (Sımba) fırmasyna da tikeleı eskertý jasaldy. Olar kinálaryn tolyq moıyndap, atalǵan shaı ónimin shyǵarý kezinde budan bylaı mundaı qatelerge oryn berilmeıtindigin málimdedi. Bul jerde til zańy talaptarynyń oryndalýyna ár mekeme basshysy tikeleı jaýapty (24-bap) ekenin eske sala ketken jón. Óıtkeni eldik maqsat el bolyp jumylǵanda ǵana oıdaǵydaı júzege asyrylatyny aqıqat qoı. Osy oraıda, til damytý máselelerin, til zańynyń oryndalýyn qoǵamdyq jáne parlamenttik baqylaýǵa alýdy uıymdastyrýǵa baılanysty Sizdiń janashyrlyq peıilińizdi joǵary baǵalaımyz, naqty usynystaryńyzdy qoldaımyz. Bul baǵytta atqarylyp kele jatqan jumystar jalǵasyn tabatyn bolady»,- deıdi Mádenıet mınıstri Muhtar Qul-Muhammed.