Sımba Almatyǵa ushyp keldi: Oǵan zoobaqta jańa úı salyp beredi
Bul jaıynda «Kazakh Tourism» UK» AQ basqarma tóraǵasy Erjan Erkinbaev óziniń Instagram paraqshasynda málimet taratty.
«Sımba aman-esen Almatyǵa ushyp keldi. Ol ázirge karantınde bolady» dep jazdy Erjan Erkinbaev óz paraqshasynda.
Onyń aıtýynsha, jyrtqysh oqshaýlanyp jatqanda haıýanattar baǵynyń ákimshiligi onyń keleshekte turatyn úı-jaıyn qalaı jabdyqtaıtynyn oılastyryp jatyr.
«Biz Sımba mekendeıtin úıdiń úlgisin jasap jatyrmyz. «Qazaqstanda qar barysynyń popýlıatsııasyn saqtaý qory» eń jyldam ári qolaıly sheshimdi tańdaıdy. Ekspozıtsııalyq áınek qoldanǵan jón be, álde zamanaýı ádemi tor durys pa, qalaı oılaısyzdar?» dep suraıdy oqyrmandarynan «Kazakh Tourism» UK» AQ basqarma tóraǵasy.
Eske sala keteıik, 25 maýsymda Mańǵystaý oblysynyń Aqshuqyr aýylynyń jergilikti turǵyndary kóshede júrgen arystandy kórip, dabyl qaqqan bolatyn. Jyrtqysh janýardy mamandar ustap, tsırkke tabystady.
Keıin Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet arystannyń taǵdyry týraly aıtyp berdi.
10 shildede jyrtqysh janýardy zańsyz asyraǵan Aqtaý turǵynyna sot úkimi shyqty.