SІM Túrkııada qaıtys bolǵan qazaqstandyqtar týraly: Qaýipsizdik beldikterin taqpaǵan

ASTANA. QazAqparat – Syrtqy ister mınıstrliginiń resmı ókili Aıbek Smadııarov Túrkııada kólik apatyna ushyraǵan qazaqstandyq otbasy týraly málimet berdi, dep habarlaıdy QazAqparat tilshisi.

«Ókinishke qaraı, keshe sýyq habar aldyq. Jol-kólik apaty bolyp, bir januıa (qazaqstandyq – red.) zardap shekti. Onyń saldarynan 1989 jyly týǵan áıel men eki jasar qyzy qaıtys boldy. 86 jyly týǵa er azamat, sol áıeldiń kúıeýi aýyr jaǵdaıda, jansaqtaý bóliminde jatyr qazir. Al 2014 jyly týǵan er bala aýrýhanada. Onyń densaýlyǵy men ómirine eshqandaı qaýip tónip júrgen joq.

Bizdiń dıplomattar ol otbasynyń týystarymen baılanysta. Búgin-erteń týystary Túrkııaǵa jetý kerek. Barlyq qajetti konsýldyq, quqyqtyq kómek kórsetemiz. Bul otbasyǵa Túrkııaǵa demalýǵa kelgen bolatyn. 31 tamyz kúni kelgen, búgin elge qaıtý kerek edi. Keshe bir ekskýrsııaǵa shyǵyp, safarı-kólikke minip, basqa kólikpen soqtyǵysqa kezde bári máshıneden ushyp ketken», - dedi ol.

Mınıstrliktiń resmı ókili kólikte 15 adam bolǵan degen derek bar ekenin aıtady.

«Sonyń tórteýi bizdiń azamattar. Ekeýi kóz jumdy. Ekeýi qazir aýrýhanada. Bul otbasynda saqtandyrý polıýsteri bolǵan. Túrkııaǵa týystary jetken soń, sol jerde naqty sheshim qabyldanady. Jaqyn arada Qazaqstanǵa tezdetip jetkizýge kómek kórsetiledi.», - dedi ol.

Sondaı-aq, SІM resmı ókili qazaqstandyqtardy shetelde júrgen kezde qaýipsizdikke basa kóńil bólýge shaqyrdy.

«Aıta ketetin jaıt, bizdiń azamattar shetelge demalýǵa barǵan kezde nemese basqa maqsattarmen júrgen kezde qaýipsizdik sharalaryn qatań saqtaǵan jón dep oılaımyz. Bizdiń bilýimizshe, ras pa ótirik pe, tergeý anyqtaı jatar, qaýipsizdik beldemshesin taqpaǵan. Sodan máshıneden bári ushyp shyqqan», - dedi Aıbek Smadııarov.