SІM shetelge shyǵatyn týrısterge: Memleket árqashan qoldaryńyzdan ustap júre almaıdy

ASTANA. QazAqparat – Syrtqy ister mınıstrligi shetelge týrıst retinde baratyn otandastarymyzdy qaýipsizdik is-sharalaryn saqtaýǵa shaqyrdy, dep habarlaıdy QazAqparat tilshisi.

Vedomstvoda ótken brıfıngide BAQ ókilderi mınıstrliktiń resmı ókili Aıbek Smadııarovtan Túrkııanyń Alanııa qalasynda jol apatynan qaıtys bolǵan bir otbasynyń 3 múshesine qatysty sońǵy málimetti suraǵan edi.

«Ol otbasy músheleriniń múrdeleri Qazaqstanǵa jetkizildi. Árıne, qazir tergeý júrgizilip jatyr. Eki kólik soǵysqan, júrgizýshileri tergelýde. Advokattar bar. Konsýlymyz olardyń týǵan-týystarymen, Túrkııanyń jergilikti quqyq qorǵaý organdarymen tyǵyz baılanysta. Azamattarymyz Túrkııada demalyp jatsa, qandaı da bir ekskýrsııaǵa ne basqa jerge baratyn bolsa, óz qaýipsizdigin qamtamasyz etýi kerek. Olardyń janynda memleket árqashan qoldarynan ustap júre almaıdy», - dedi Aıbek Smadııarov.

Onyń atap ótýinshe, Syrtqy ister mınıstrligi atalǵan otbasy músheleriniń múrdelerin elge jetkizý úshin jan-jaqty kómek kórsetken.

Esterińizge sala ketsek, 4 qyrkúıek kúni Túrkııanyń Alanııa qalasynda safarı-kólik pen jeńil avtomobıldiń soqtyǵysýy saldarynan jýrnalıst, «Zeıin Atyraý» erekshe balalardy ońaltý ortalyǵynyń negizin qalaǵan Araılym Baǵytjan men 2 jasary qyzy oqıǵa ornynda qaıtys boldy.

Birneshe kúnnen keıin aýrýhananyń jansaqtaý bólminde jatqan otbasynyń otaǵasy da kóz jumdy.