SІM Pragadaǵy jarylystar kezinde zardap shekkender arasynda qazaqstandyqtardyń bar ne joq ekendigin anyqtaýda
ALMATY. 29 sáýir. QazAqparat - QR Syrtqy ister mınıstrligi dıplomatııalyq ókildik arqyly Chehııa astanasy Pragada oryn alǵan jarylystar kezinde zardap shekkender arasynda qazaqstandyqtardyń bar ne joq ekendigin anyqtaýda.
«Pragadaǵy QR Elshiligi jarylys barysynda zardap shekken qazaqstandyqtardyń bolýyn tekserý ústinde. Qosymsha habarlaıtyn bolamyz», - delingen mınıstrliktiń Tvıtter-akkaýntynda.
Aıta keteıik, jarylys Praganyń Karlov ýnıversıtetiniń áleýmettaný fakýlteti jáne Chehııa Ulttyq teatrynyń janyndaǵy úıde bolǵan.
Jarylys nátıjesinde ǵımarat qatty zaqymdanǵan. Pragalyq qutqarýshylar tobynyń bastyǵy Zdenek Shvartstyń aıtýyna qaraǵanda, kem degende 40 adam, negizinen ýnıversıtet stýdentteri, jaraqattanǵan. Kópshiliginiń jaraqattary synǵan áınekterdiń kesip ketýine baılanysty oryn alǵan. Tórt adam aýrýhanaǵa jetkizildi, olar aýyr jaraqat alǵan. Ázirge rastalmaǵan málimetter boıynsha, jaraqat alǵandardyń bireýi qaıtys bolǵan.
Polıtsııa búkil aýdandaǵy adamdardy qaýipsiz jerge kóshirdi. Ýnıversıtet basshylyǵy jaqyn kúnderde sabaqtardyń bolmaıtynyn jarııalady. Alǵashqy málimetter boıynsha, tótenshe oqıǵaǵa gazdyń jarylýy sebep bolýy múmkin.
