SІM men «Samuryq-Qazyna» birlesken is-qımyl josparyn bekitti
QR SІM baspasóz qyzmetiniń habarlaýynsha, tıisti qujatty Syrtqy ister mınıstri Qaırat Ábdirahmanov jáne «Samuryq-Qazyna» AQ basqarma tóraǵasy Ahmetjan Esimov bekitken.
Josparǵa sáıkes, Syrtqy ister mınıstrligi men Qazaqstannyń shet elderdegi dıplomatııalyq mıssııalary ekonomıkalyq dıplomatııany damytý aıasynda atalmysh qorǵa óz strategııalyq mindetterin iske asyrýǵa járdemdesedi. Sheteldik seriktesterdi tartý arqyly Qazaqstannyń basym sektorlarynda turaqty ekonomıkalyq ósimge qol jetkizý jumysy qarqyn alady.
Qujat ınvestıtsııa tartý, halyqaralyq is-sharalar jáne aqparattyq-túsindirme jumystaryn ótkizý, energetıkalyq keshendi damytý, jekeshelendirýdiń 2016-2020 jyldarǵa arnalǵan keshendi josparyn, tranzıttik jáne kólik áleýetin iske asyrý, elimizge tehnologııalardyń transferti jáne qazaqstandyq eksportty ilgeriletý boıynsha ózara árekettestiktiń baǵyttaryn naqtylady. Sheteldik seriktestermen qol jetkizilgen ýaǵdalastyqtardy iske asyrýǵa birlesip baqylaý júrgiziledi. Qazaqstannyń shet eldermen ekijaqty iskerlik keńesterin daıyndaý men ótkizýdegi kúsh-jigerdi úılestirýge erekshe mán beriledi.
Syrtqy saıası vedomstvo óz qyzmetinde salalyq mınıstrlikter jáne ulttyq kompanııalarmen belsendi túrde jumys isteıdi. Qazirgi tańda qabyldanǵan birlesken qujattardyń aıasynda Investıtsııalar men damý, aýyl sharýashylyǵy, qorǵanys jáne aeroǵarysh ónerkásibi, mádenıet jáne sport mınıstrlikterimen, sondaı-aq «Kazakh Invest» UK» AQ men «Kazakh Tourism» UK» AQ-men yntymaqtastyq júıelengen. Sondaı-aq, «Kazakh Export» AQ-men memorandým jáne is-sharalar jospary qabyldanady dep kútilýde.
