SІM Qytaıda qaza tapqan Dınara Erenovaǵa qatysty mán-jaıdy aıtty

ASTANA. QazAqparat -  Qytaıdyń Foshan qalasynda qaıtys bolǵan qazaqstandyq Dınara Erenovanyń múrdesi taıaý kúnderi elge jetkiziledi. Bul týraly búgin QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Ózderińizde biletindeı, azamatshamyz Dınara Erenova ótken aptada Qytaıda qaıtys boldy. Beıjińdegi konsýlymyz birden onyń týǵan-týystarymen baılanysqa shyqty. Birinshi kúnnen bastap bizde konsýlmen baılanysqa shyǵyp otyrmyz. Búgin, 26 qarashada Dınaranyń ólimi týraly qytaılyq kýálik rásimdeldi», - dedi ol.

Resmı ókildiń aıtýynsha, keıbir otandyq BAQ habarlaǵandaı, Dınara Erenova stýdent emes. Ol Qytaıda jumys istep júrgen. Gýanchjoýǵa taqaý Foshan  qalasynda turǵan.

«Onyń múrdesi Foshannan Gýanchjoý qalasyna jetkizildi. Konsýlymyz jan-jaqty kómek kórsetý jáne qajetti qujattardy rásimdeý úshin sol jaqta júr. Taıaý ýaqytta múrde Qazaqstanǵa jetkiziledi dep oılaımyz. Qyzdyń týǵan-týystary ólim sebebin anyqtaý úshin múrdeni  soıýǵa ruqsat bermedi. Sebebi, qytaı zańyna sáıkes mundaı shara shamamen 30 kún ýaqytta alady. Sondyqtan týystary múrdeni elge alyp kelmek», - dedi Aıbek Smadııarov.