​​SІM: Qorǵanys mınıstrliginiń ushaǵymen 35 qandas Aýǵanstannan Qazaqstanǵa oraldy

NUR-SULTAN. QazAqparat - Qazaqstan Prezıdenti Qasym-Jomart Toqaevtyń tapsyrmasyna sáıkes búgin Aýǵanstannan 35 qandastyń tarıhı otanyna oralýy uıymdastyryldy, dep habarlaıdy QazAqparat QR SІM baspasóz qyzmetine silteme jasap.

QR Qorǵanys mınıstrliginiń arnaıy ushaǵy Kabýldan Almaty qalasynyń áýejaıyna 41 jolaýshymen ushyp keldi, olardyń ishinde Qazaqstannyń 4 azamaty, Qyrǵyzstannyń 1 azamaty jáne Qazaqstanda turaqty turatyn 1 aýǵan bar. Kelgen jolaýshylar karantınnen ótý úshin ýaqytsha oqshaýlanady. Evakýatsııalyq reısti uıymdastyrý «Talıban» qozǵalysymen úılestirilip júzege asyryldy. Qazaqstannyń Kabýldaǵy Elshiligi qalypty rejımde jumys isteıdi jáne Aýǵanstanda turatyn qandastarmen turaqty baılanysta», delingen habarlamada.

Mınıstrliktiń málimetinshe, qazir ótinish berýshilerdiń etnıkalyq sáıkestigin rastaý jáne qandastardy qaıtarý jumysy jalǵasyp jatyr.

Eske sala ketsek, QR Prezıdenti Qasym-Jomart Toqaev jańadan taǵaıyndalǵan tótenshe jáne ókiletti elshileriniń Qazaqstan Prezıdentine senim gramotasyn tapsyrý rásiminde Aýǵanstandaǵy qazaq dıasporasyn elge qaıtarý máselesin qarastyryp jatqanyn málimdegen edi.

18 tamyzda Qazaqstan Aýǵanstannan óziniń 25 azamatyn jáne Qyrǵyzstan, Reseı men Lıtvanyń 16 azamatyn evakýatsııalady. Budan basqa, Almatyǵa Kabýldan Aýǵanstanǵa kómek kórsetý jónindegi BUU Mıssııasy (UNAMA) jáne basqa da halyqaralyq uıymdardyń keńseleri ýaqytsha kóshirildi.