SІM Qazaqstannyń Ýkraınadaǵy elshisiniń ulyn soqqyǵa jyǵyp ketkeni týraly aqparatty joqqa shyǵarady

Bul týraly QR SІM baspasóz qyzmeti habarlady.

«Birqatar BAQ-ta jarııalanǵan 2013 jylǵy 5 jeltoqsanda Kıev qalasynda Qazaqstan elshisiniń ulyn soqqyǵa jyqqany týraly aqparatqa qatysty, bul aqparattyń shyndyqqa janaspaıtynyn habarlaımyz. Qazaqstannyń Ýkraınadaǵy elshisiniń eki uly da aman-saý», delingen QR syrtqy saıasat vedomstvosynyń habarlamasynda.

Qazir qazaqstandyq elshiliktiń qyzmetkerleri Ýkraına Joǵarǵy Radasynyń depaýtaty Aleksandr Efremovpen habarlasyp, onyń málimdemesiniń mánisi jaıly túsindirme alýǵa tyrysýda.

«Sonymen birge, elshilik Ýkraınanyń quqyq qorǵaý organdary arqyly Qazaqstannyń basqa da azamattaryna qatysty osy aqparatty tekserýde», - dep qosty baspasóz qyzmetinen.

Eske sala keteıik, Aımaqtar partııasy fraktsııasynyń kóshbasshysy Aleksandr Efremov «Shýster Live» baǵdarlamasynyń efırinde Kıevte Joǵarǵy Radanyń burynǵy halyq depýtatynyń ulyn urlap ketkenin habarlaǵan bolatyn.

«Ol Qazaqstan elshisiniń ulymen birge Kıev qalasynyń kóshesinde kele jatty. Qazaqstan elshisiniń ulyn soqqyǵa jyqty. Al ony mashınaǵa salyp alyp, belgisiz baǵytqa alyp ketti», - dep áńgimeledi A.Efremov.