SІM: Qazaqstan 10 memleketpen vızasyz rejımde qarym-qatynas ornatatyn pılotty jobany júzege asyrmaq
ASTANA. QazAqparat - Qazaqstannyń Syrtqy ister mınıstrligi on memleketpen vızasyz rejımdi júzege asyrýǵa nıetti. Degenmen, osyndaı saıasatqa múddeli taraptar sany kóp bolyp otyr. Búgin Parlament Májilisindegi Úkimet saǵatynda QR Syrtqy ister mınıstri Erlan Ydyrysov osylaı málimdedi.
«Biz vızasyz rejım boıynsha 10 memleketke deıin pılotty jobany júzege asyrmaqpyz. Qazir buny keńeıtýge bola ma, bolmaı ma sony talqylap jatyrmyz. Al 10 memlekettiń quramynda AQSh, Ulybrıtanııa, Germanııa, Frantsııa, Birikken Arab Ámirlikteri, Malaızııa, Japonııa men Ońtústik Koreıa sekildi elder bar», - dedi E. Ydyrysov.
Mınıstrdiń sózine qaraǵanda, kóptegen elder Qazaqstanmen arada vızasyz qarym-qatynas ornatýǵa barynsha qyzyǵýshylyq tanytqan. Tipti, bul áńgime barysynda elderdiń uzyn-sonar kezegi de qalyptasyp qalǵan kórinedi.
Al solardyń arasynda eń birinshi kezekte Qytaı Qazaqstanmen vızasyz rejımge meılinshe múddeli ekenin tanytqan.
«Qytaı «biz Qazaqstanda eń úlken ınvestormyz, bizge vızasyz rejım ornatyńyzdar» degendi alǵa tartady. Álbette, buǵan biz barǵymyz kelmeıdi, ony túsindirip jatýdyń qajeti de joq shyǵar. Degenmen, Qytaı halqynyń 2 mlrd.-qa jýyq ekenin de eske salaıyq», - deıdi E. Ydyrysov.
Sonymen qatar, syrtqy saıasat vedomstvosynyń basshysy keleshekte vıza berý rejımi elektrondy túrge almastyrylýy múmkin ekenin jetkizdi.
