SIM-karta arqyly jasalǵan qylmys úshin nómir ıesi de jaýap berýi múmkin
ASTANA. KAZINFORM — Qazir ınternet-alaıaqtar túrli aıla-tásilderdi qoldaný arqyly azamattardy aldaýdyń jańa joldaryn taýyp otyr, dep habarlaıdy Abaı oblysy Polıtsııa departamentiniń baspasóz qyzmeti.
Vedomstvo atap ótkendeı, solardyń biri — jastardy ońaı tabys ýádemen óz atyna SIM-karta rásimdetip alyp, keıin ony úshinshi tulǵalarǵa satý nemese berý.
— Mundaı áreket syrt kózge zııansyz kóringenimen, onyń saldary óte aýyr bolýy múmkin. Sebebi sizdiń atyńyzǵa tirkelgen SIM-karta qylmystyq maqsatta paıdalanylsa, barlyq quqyqtyq jaýapkershilik eń aldymen sol nómir ıesine — ıaǵnı sizge júktelýi yqtımal, — deıdi tártip saqshylary.
Alaıaqtar SIM-kartany qalaı paıdalanady?
- Azamattardyń jeke derekterin urlaý;
- Banktik qosymshalar men onlaın servısterdi buzý;
- Qońyraýlar men habarlamalar arqyly aldaý shemalaryn júzege asyrý;
- Ártúrli zańsyz áreketterdi anonımdi túrde jasaý.
Sondyqtan «jeńil aqsha tabamyn» degen oıdyń artynda úlken qaýip jasyrynǵanyn umytpańyz.
— Ózińizdi jáne jaqyndaryńyzdy qorǵaý úshin: Óz atyńyzǵa rásimdelgen SIM-kartany eshkimge bermeńiz; Belgisiz nemese kúmándi adamdardyń usynystaryna kelispeńiz; «Satyp alamyz», «rásimdep ber» degen usynystardan bas tartyńyz; Jeke derekterińizdi, SMS-kodtardy jáne tirkeý málimetterin qupııa saqtańyz; Eger kúmándi jaǵdaıǵa tap bolsańyz, birden quqyq qorǵaý organdaryna habarlasyńyz. Este saqtańyz: zań aldynda jaýapkershilik naqty áreket jasaǵan adamǵa ǵana emes, sol áreketke múmkindik bergen nómir ıesine de tıesili bolýy múmkin. Óz atyńyz — óz jaýapkershiligińiz. Óz nómirińiz — óz qaýipsizdigińiz! — dep eskertti PD.
Buǵan deıin balalardy qaýipti kontentten qorǵaıtyn sım-karta iske qosylatynyn jazǵanbyz.
