SIM-karta satyp alý tásili ózgermek: neni bilgen jón

ASTANA. KAZINFORM — Elimizde uıaly telefon nómirin (SIM-karta) satyp alý tásili túbegeıli ózgeredi. Qazir bul másele qyzý talqylanyp jatyr, Tsıfrlyq damý, ınnovatsııalar jáne aeroǵarysh ónerkásibi mınıstrligi tıisti túzetýlerdi ázirledi.

— Mınıstrlik zańnamaǵa ózgerister engizýdi usyndy, usynystar telekommýnıkatsııa naryǵy men derekterdi óńdeý ortalyǵyn damytý máseleleri jónindegi zań jobasynda kórsetilgen. Zań jobasynda abonenttik nómirlerdi tek operatorlar arqyly ǵana emes, eGov arqyly da taratý múmkindigin qarastyryp jatyrmyz. Aldaǵy ýaqytta qazaqstandyqtar uıaly telefon nómirin onlaın tańdap, úıden shyqpaı-aq satyp alýy múmkin, — dedi Tsıfrlyq damý, ınnovatsııalar jáne aeroǵarysh ónerkásibi mınıstrligi Telekommýnıkatsııalar komıteti tóraǵasynyń orynbasary Oljas Qabenov vedomstvoda ótken jarııa talqylaý kezinde.

Onyń aıtýynsha, qazir jańa ereje boıynsha baılanys operatorlary mınıstrlikke ótinim beredi, sonyń negizinde operatorlarǵa SIM-karta nómirleri pýly beriledi, odan ári qazaqstandyqtar satyp ala alady. 

Osylaısha SIM-kartany tek baılanys operatorlarynan ǵana emes, eGov portaly arqyly da satyp alý múmkindigi bolady. Alaıda, mınıstrlik ókiliniń málimdeýinshe, atalǵan ózgerister týraly naqty aıtýǵa áli erte, sebebi, zań jobasy talqylanyp jatyr. Normanyń qashan kúshine enetini, ázirge belgisiz.

Aıta ketsek, eGov qyzmeti arqyly zańsyz tirkelgen SIM-kartany anyqtaýǵa bolady. 

Sondaı-aq elimizde SIM-karta sanyn shekteý máselesi, ıaǵnı bir qolǵa bir ǵana SIM-karta berý máselesi talqylanyp jatyr.