Sim-karta men akkaýntty berý qylmysqa járdemdesý retinde qaralady — ІІM
ASTANA. KAZINFORM — ІІM áleýmettik jeliler men messendjerlerdegi akkaýnttardy úshinshi tulǵalarǵa berý faktileri týraly málimdedi. Alaıaqtar jasóspirimderden sim-kartalar men akkaýnttar alyp, olardy óz maqsattaryna paıdalanyp jatyr.
Polisia.kz málim etkendeı, polıtsııa mundaı áreketter qylmysqa járdemdesý retinde saralanatynyn eskertti.
— Kámeletke tolmaǵandardyń materıaldyq syıaqy alý maqsatynda áleýmettik jeliler men messendjerler arqyly úshinshi tulǵalardyń ótinishimen sim-kartalardy iske qosyp, olardy áleýmettik jeliler men messendjerlerge tirkep, keıin basqa adamdarǵa berý jaǵdaılary tirkelýde. Qaskóıler bul akkaýnttardy azamattarǵa alaıaqtyq qońyraýlar jasaý úshin paıdalanady. Áleýmettik jeliler men messendjerlerdegi akkaýnttardy tirkeý jáne olardy bógde adamdarǵa berý alaıaqtyq pen ózge de zańsyz áreketterdi jasaý quralyna aınalýy múmkin. Qazaqstan Respýblıkasynyń zańnamasyna sáıkes mundaı áreketter qylmys jasaýǵa járdemdesý retinde qaralady, — dedi ІІM kıberqylmysqa qarsy is-qımyl departamentiniń basqarma bastyǵy Beıbit Birjanov.
ІІM azamattardy:
- shyǵý tegi kúmándi sim-kartalar men qurylǵylardy satyp almaýǵa jáne taratpaýǵa;
- óz akkaýnttaryn úshinshi tulǵalardyń paıdalanýyna bermeýge;
- kámeletke tolmaǵandarǵa mundaı áreketterdiń jaýapkershiligi men saldaryn túsindirýge;
- abonenttik nómirlerdi messendjerlerde tirkep, keıin olardy bógde adamdarǵa bermeýge;
- kúdikti áreketter baıqalsa, quqyq qorǵaý organdaryna habarlaýǵa shaqyrady.
Polıtsııa tsıfrlyq keńistiktiń barlyq qatysýshysyna qyraǵy bolýdy usynady.
Aıta keteıik, búginde adam qaıtys bolǵan soń osy ómirde ǵana emes, vırtýaldy álemde de izi qalady. Smartfondaǵy myńdaǵan fotosýret, áleýmettik jelidegi paraqshalary men bultty servısterdegi qujattardyń bári «tsıfrlyq mura» dep atalady. Alaıda adam ólgennen keıin bul derektermen ne bolmaq? Qazaqstan zańy ony qalaı retteıdi? Kazinform tilshisi máseleniń mán-jaıyna úńilip kórdi.
