SІM-de Qońyr Mandokıdiń jubaıy ǵalym týraly estelikterimen bólisti

ASTANA, 2018 jylǵy 19 naýryz - Syrtqy ister mınıstrliginde ataqty majar saıasattanýshysy, túrkitanýshy, qypshaq tarıhyn zertteýshisi Ishtvan Qońyr Mandokıdiń zaıyby Ońaısha Mandokımen kezdesý ótti, dep habarlaıdy QazAqparat QR SІM baspasóz qyzmetine silteme  jasap.

Ońaısha apaı qazaq dıplomattary jáne baspasóz ókilderimen kezdesý úshin Býdapeshtten arnaıy keldi. Kezdesýge qatysýshylarǵa zertteýshiniń ómiri týraly prezentatsııa kórsetildi, onyń kózqarasy men ǵylymı jumystary týraly, túrkitanýdyń qalyptasýyna jáne Qazaqstan men Majarstan arasyndaǵy dostyq qarym-qatynastarynyń damýyna qosqan úlesi týraly egjeı-tegjeıli aıtyldy.

O. Mandokı Majarstanda turady jáne jergilikti ýnıversıtetterdiń stýdentterine qazaq tilin úıretedi. Ǵalymnyń zaıyby estelikterimen bólise kele, «Qońyr týraly Elbasy Nursultan Nazarbaev «Ol eki halyq arasyndaǵy tek tarıhı týystyqty dáleldep ǵana emes, sonymen birge qarym-qatynastardyń jetildirýine, eki halyqtyń birligine jáne jalpy mádenıettiń gúldenýine septigin tıgizgen orasan zor eńbeginiń úlgisi retinde qazaq halqy ony maqtanyshpen eske alyp, qurmetke bólenedi» degenin aıtty. «Qońyrdyń ózi qazaqtar men majarlar arasyndaǵy «altyn kópir» bolyp edi. Bizge, eki halyqqa, elderimiz arasyndaǵy máńgilik dostyq úshin bul kópirdi paıdalanýymyz ǵana qaldy», - dedi ol.

Eske sala ketsek, Końyr Mandokı 1944 jyly Majarstanda dúnıege keldi. Ol óz ómirin qypshaq jáne túrki áleminiń tarıhyn zertteýge arnady. Ǵalymnyń aıtýynsha, barlyq qypshaqtar arasynda oǵan eń jaqyn bolǵan - qazaqtar.

Aıta keterligi, Almatyda Q. Mandokıdiń esimi Áýezov aýdanyndaǵy orta mektepke, sondaı-aq Medeý aýdanyndaǵy kóshege berilgen.