SІM burynǵy jaýapty xatshysy Qarashevtiń úıinen 1,5 mln dollar tabyldy
QR Memlekettik qyzmet isteri jáne sybaılas jemqorlyqqa qarsy kúres agenttigi tóraǵasynyń orynbasary Oljas Bektenovtyń aıtýynsha, Syrtqy ister mınıstrliginiń burynǵy jaýapty xatshysy Anarbek Qarashev basqa qyzmetkerlerdiń qylmystaryn jasyryp, para alyp otyrǵan. Olardyń ishinde sharýashylyq basqarmanyń jetekshisi Sákenova, «Dıplomatııalyq qalashyqty salý dırektsııasy» JShS dırektory Nurekenov, resmı sharalar bóliminiń basshysy Jumasanova jáne basqa da tulǵalar bar.
«Qarashevtiń úıin tintý kezinde 1,5 mln AQSh dollary tárkilendi. Al Nurekenov 200 myń dollardy tyǵyp qoıdy. Qarashev ózine qarasty qyzmetkerlerden turaqty túrde para alǵany úshin aıyptalyp otyr. Al Sákenova, Nurekenov pen Jumasanova 28 mln teńgeden astam para alǵany úshin jaýapqa tartyldy. Ol aqshany xalyqaralyq sharalardy ótkizgen kásipkerler berip otyrǵan», - dedi O.Bektenov Syrtqy ister mınıstrliginde ótken kezdesýde.
Oǵan qosa, Qarashev óziniń jıenine qarasty «Lara grýpp» atty fırmaǵa lobbı jasap kelgen. Ol kompanııa memlekettik qyzmetkerlerdiń sheteldik saparlaryna áýe bıletterin satyp alýmen aınalysqan.
«Olar komıssııany artyq kórsetip, bıýdjettiń 9,8 mln teńgesin qoldy qylǵan. Sondaı-aq, Qarashev Ózbekstandaǵy Qazaqstannyń elshiligine kúrdeli jóndeý jumystary jasalmasa da, atqarylǵan jumystar jónindegi aktilerge qol qoıdy. Sonyń saldarynan bıýdjet 70 mln teńgeden astam qarjyǵa shyǵyndaldy. Osy iske mınıstrliktiń basqa da laýazymdy tulǵalary men elshilik qyzmetkerleri qatysýy ábden múmkin. Qazirgi kezde sotqa deıingi tergeý sharalary atqarylýda», - dep atap kórsetti O.Bektenov.