SIM-box arqyly alaıaqtyq jasaǵan transulttyq toptyń 24 múshesi 8 jylǵa sottaldy
ASTANA. KAZINFORM – Astana qalasynyń Qylmystyq ister jónindegi aýdanaralyq soty zamanaýı telekommýnıkatsııalyq tehnologııalardy paıdalanyp, alaıaqtyq qońyraýlar uıymdastyrǵan transulttyq qylmystyq toptyń 24 múshesin kináli dep tanydy, dep habarlaıdy Qaraǵandy oblysynyń prokýratýrasy.
Sot árqaısysyna 8 jylǵa bas bostandyǵynan aıyrý jazasyn taǵaıyndady. Qazirgi ýaqytta úkim zańdy kúshine engen joq.
Sotta uıymdasqan top músheleriniń kelisilgen túrde áreket etkeni, árqaısysyna naqty ról bólingeni jáne olardyń jumysyn uıymdastyrýshylar úılestirip otyrǵany anyqtaldy. Qatysýshylardyń kópshiligi Qazaqstanǵa Reseıden kelgen. Keıbiri uıymdastyrýshylardyń nusqaýy boıynsha jabdyq satyp alý úshin Reseıge barǵan.
Oryndaýshylar negizinen Telegram arqyly tabylǵan. Olarǵa belgili bir qalaǵa kelip, turǵyn úı jaldaý, SIM-box qurylǵylaryn alý nemese jetkizý, jabdyqty ınternetke qosý, qazaqstandyq baılanys operatorlarynyń SIM-kartalaryn ornatý jáne qurylǵylardyń úzdiksiz jumysyn qamtamasyz etý tapsyrylǵan. Bul úshin kúnine 50-den 100 dollarǵa deıin aqy tólengen.
– Negizgi dálelderdiń biri sottalǵandardyń telefondarynan tabylǵan Telegram hat-habarlary boldy. Onda jabdyqty ornatý jáne tehnıkalyq qyzmet kórsetý, SIM-kartalardy aýystyrý, tapsyrmalardy oryndaý jáne úılestirýshilerge esep berý jónindegi nusqaýlar bolǵan, – delingen prokýratýra habarlamasynda.
Tergeý barysynda SIM-box-qa qosylǵan telefon nómirleri arqyly azamattarǵa alaıaqtyq qońyraýlar jasalǵany anyqtaldy. Qaskúnemder ózderin memlekettik organdardyń, bankterdiń, «Qazposhta» AQ jáne basqa da uıymdardyń qyzmetkerleri retinde tanystyrǵan.
Olar azamattardan rastaý kodtaryn alyp, nesıe rásimdeýge jáne aqsha aýdarýǵa kóndirgen.
Sottalýshylar kinálaryn moıyndamaǵan. Alaıda prokýratýra usynǵan dáleldemeler olardyń uıymdasqan qylmystyq áreketke qatysqanyn rastaǵan.
Aıta keteıik, «Damý» qory arqyly nesıe alyp beremin degen alaıaq 4 jylǵa sottaldy.
