SІM bolashaq dıplomattarǵa úndeý jazylǵan «Ýaqyt kapsýlasyn» saldy

NUR-SULTAN. QazAqparat – Táýelsiz Qazaqstan dıplomatııalyq qyzmetiniń 30 jyldyǵyn merekeleý aıasynda QR Syrtqy ister mınıstrligi ǵımaraty aldyndaǵy alańda bolashaq dıplomattarǵa úndeý jazylǵan ýaqyt kapsýlasyn salý rásimi ótti, dep habarlaıdy QazAqparat tilshisi.

Bul kapsýlany olardyń áriptesteri týra 30 jyldan keıin, ulttyq dıplomatııanyń 60 jyldyǵy atalyp ótiletin 2052 jyldyń 1 shildesinde ashýy kerek.

Іs-shara barysynda QR Premer-Mınıstriniń orynbasary – Syrtqy ister mınıstri Muhtar Tileýberdi bolashaq dıplomattar ózderiniń izasharlarynyń jumysyn laıyqty jalǵastyryp, elimizdiń ulttyq múddelerin qorǵaý men ilgeriletý jolynda da aıanbaı ter tógetinine senim bildirdi.

Saltanatty sharaǵa qatysýshylar aldynda sóz sóılegen qazaq dıplomatııasynyń qurmetti ardageri, kórnekti memleket qaıratkeri Qýanysh Sultanov 30 jyldan keıin qazaq dıplomatııasy budan da zor tabystarǵa jetip, elimizdiń halyqaralyq arenadaǵy bedelin nyǵaıtýǵa eleýli úles qosatynyna senim bildirdi.

Kapsýladaǵy bolashaq dıplomattarǵa arnalǵan úndeýde Qazaqstannyń 30 jyldaǵy álemdegi ustanymy, qazirgi dıplomattar men Qazaqstannyń dıplomatııalyq qyzmeti ardagerleriniń qoshtasý sózderi men tilekteri jazylǵan.

Arnaıy ornatylǵan tuǵyrǵa kapsýlany salý qurmetti mıssııasy jas dıplomattar – Eýropa departamentiniń attashesi Altynaı Dáribaeva men Adamı resýrstar departamentiniń attashesi Damır Ahmetovke júkteldi.

Saltanatty is-sharaǵa SІM basshylyǵy, Qazaqstan Respýblıkasy dıplomatııalyq qyzmetiniń ardagerleri, qazirgi dıplomattar jáne mınıstrlikte uıymdastyrylǵan «Halyqaralyq qatynastardyń qazirgi zamanǵy júıesindegi Qazaqstan Respýblıkasy» atty halyqaralyq konferentsııasynyń basqa da qatysýshylary qatysty.