SІM Baıqońyrǵa qatysty dúrbeleń týdyrmaýǵa shaqyrady
Bul týraly QR SІM Halyqaralyq aqparat komıtetiniń orynbasary Janbolat Úsenovtiń túsiniktemesinde aıtylǵan.
«Eń aldymen, Qazaqstan men Reseı arasyndaǵy áriptestiktiń strategııalyq sıpatyn taǵy da atap ótkim keledi. Al reseılik gazette jaryq kórgen maqala bolsa, biz oǵan qatysty kelesini habarlaımyz. Óziniń sapary aldynda Qazaqstan Respýblıkasynyń Syrtqy ister mınıstri Erlan Ydyrysov «Kommersant» gazetine suhbat bergen bolatyn. Onda ol qazaqstandyq taraptyń Baıqońyr máselesine qatysty ustanymyn tolyq ashyp aıtty. Bul suhbat erteń jaryq kórýge tıis. Baıqońyr ǵarysh aılaǵyn birlese qoldaný - bizdiń ekijaqty qarym-qatynasymyzdyń kún tártibindegi máselelerdiń biri. Bul qarym-qatynas dástúrli túrde áriptestik jáne odaqtastyq rýhynda júzege asady. Ózderińizge belgili bolatyndaı, atalǵan másele ótken jyldyń aıaǵynda QR Prezıdenti Nursultan Nazarbaevtyń Reseı Federatsııasyna sapary aıasynda eki eldiń basshylarymen talqyǵa salynǵan bolatyn», - dedi ol.
Onyń atap ótýinshe, búginde Baıqońyr ǵarysh aılaǵyn qoldanýǵa qatysty barlyq máselelerdi talqylaýdan ótkizetin jumys úderisi júrip jatyr. Eki eldiń Premer-Mınıstrleriniń orynbasarlary Q.Kelimbetov pen I.Shývalov bastaǵan arnaıy ekijaqty komıssııa jumys isteýde. 30 qańtar kúni Máskeýde komıssııa basshylarynyń kezdesýi josparlanǵan.
«Qazir bizdiń Syrtqy ister mınıstrimiz Erlan Ydyrysovtyń Máskeý qalasyna sapary ótýde. Sapar barysynda E.Ydyrysov óz áriptesi Sergeı Lavrovpen de Baıqońyr máselesin qarastyratyn bolady. Naqty aıtqanda, búgingi tańda Baıqońyr ǵarysh aılaǵyn birlese qoldaný máseleleri boıynsha ádettegi kelissózderdiń jumys úderisi júrip jatyr. Onyń barysynda qazaqstandyq tarap, Reseı bizdiń tarıhı áriptesimiz jáne odaqtasymyz ekenin tolyǵymen eskere otyryp, eń aldymen óziniń ulttyq múddelerin basshylyqqa alýda. Osy múmkindikti paıdalana otyryp, barlyq BAQ ókilderin bul másele tóńireginde dúrbeleń týdyrmaýǵa shaqyrǵym keledi. Árıne, másele kúrdeli tehnologııalyq keshen, kúrdeli ınfraqurylym men sol óńirde turatyn halyqtyń taǵdyry jaıly bolyp otyr. Degenmen, Qazaqstan men Reseı óziniń 21 jyldyq yntymaqtastyǵy barysynda budanda aýyr máselelerde ózara tıimdi sheshimder taba bilgen. Baıqońyr máselesi de ekijaqtyń ózara múddelerin qanaǵattandyryp, óz sheshimin tabatynyna senimdimiz», - deıdi J.Úsenov óz túsiniktemesinde.