SІM Avstrııada qıyndyqqa tap bolǵan qazaqstandyq otbasy týraly aıtty
NUR-SULTAN. QazAqparat – QR SІM resmı ókili Aıbek Smadııarov Avstrııada qıyndyqqa tap bolǵan qazaqstandyq otbasyǵa qatysty pikir bildirdi, dep habarlaıdy QazAqparat tilshisi.
«Atalǵan aqparat jergilikti BAQ-ta jarııalandy. Bizdiń qolymyzdaǵy málimet boıynsha Baıdelder otbasy Avstrııanyń Nıdelrvaldkırhen qalasynda shirkeýdiń janynda 2013 jyldan beri turyp jatyr. Olar baspana suraýshy mártebesindegi otbasy. Turaqty jumys oryndary joq. Jergilikti áleýmettik kómek alyp otyr», - dedi ol SІM-de ótken brıfıng barysynda.
Onyń aıtýynsha, Avstrııadaǵy jergilikti bılik olardy elde qaldyrýdan, baspana berýden bas tartqan.
«Osy oqıǵadan keıin otbasynyń músheleri men kórshileri, baspana berip, elde qaldyrýdy talap etip, kóshege shyqqan. Alaıda sol eldiń zań boıynsha ol otbasyn elde qaldyrýǵa eshqandaı negiz joq. Bizdiń konsýl bul otbasymen baılanys ustap otyr. Qajet bolǵan jaǵdaıda olarǵa qajet kómek kórsetiletin bolady», - dedi ol.
