Silk Way telearnasynan «Orel ı Reshka. Kazahı» jańa maýsymy kórsetiledi
QR Prezıdenti Teleradıokesheniniń Silk Way telearnasy kórermenge tanymal trevel shoýdyń «Orel ı Reshka. Kazahı» dep atalatyn biregeı maýsymyn usynady, dep habarlaıdy QazAqparat.
Baǵdarlamanyń 15 shyǵarylymynda saıahatshylar – kınoprodıýser, aktrısa Quralaı Anarbekova men tanymal bloger Ǵanı Ájikenovtyń taǵdyryn baqyr sheshedi.
Júrgizýshilerimiz Qazaqstannyń óńirlerinde bolyp, eldegi tańǵajaıyp mekenderdiń ereksheligi men sulýlyǵyn kórsetedi. Sondaı-aq álemniń ǵajap qalalaryn aralaǵandaǵy áserin bólisedi.
Tanymal televızııa franshızasynyń qazaqstandyq nusqasy elimizdiń kórikti jerleriniń biri – Qatonqaraǵaıǵa saıahattan bastalady.
Sodan keıin Ǵanı men Quralaı kıeli Mańǵystaýdyń qupııasyna úńilip, kóne Túrkistanda demalys ótkizedi.
Júrgizýshilerimizdi ǵajaıyp Dýbaı, ǵalamat Venetsııa, karnaval shoýlarymen tanymal Rıo de Janeırodaǵy qyzyqty oqıǵalar kútip tur. Sondaı-aq saıahatshylarymyz bar jerde qazaqtarmen kezdesip, sheteldegi ómir týraly tildesedi.
- Bul shoý Otanymyzdy basqa qyrynan tanýǵa kómektesedi. Joba Qazaqstan óńirleriniń ózgesheligi men biregeıligin ashyp, qyzyǵýshylyǵy men ómir joly árqıly adamdar týraly aıtady. Tanymal trevel shoýdyń bizdiń nusqamyzdaǵy erekshelegi de – osy, - dep atap ótti QR Prezıdenti Teleradıokesheniniń bas dırektory Raýshan Qajybaeva.
«Orel ı Reshka» birneshe ret Astana men Almatyda demalys ótkizgenin eske sala keteıik.
Baǵdarlamanyń barlyq maýsymynda qazaqstandyq kórermender «Orel ı Reshka» ujymyn súıikti qalalaryna shaqyratyn. Al endi baǵdarlama saıahatyn Qazaqstannyń basqa óńirlerinde jalǵastyrady.
Aıta ketsek, jobaǵa Freedom Holding Corp qoldaý bildirdi.