«Silk Way» telearnasy túrik tilinde habar taratady

ASTANA. KAZINFORM – 2024 jyldyń 1 mamyrynda «Silk Way» telearnasy túrik tilinde habar tarata bastaıdy.

«Silk Way» - eldiń iri medıaholdıngi - QR Prezıdentiniń teleradıokesheni quramyna kiretin tuńǵysh ulttyq spýtnıktik televızııalyq arna.

Telearnanyń shetel kórermenderine usynatyn ónimderi aqparattyq-saraptamalyq baǵdarlama, dokýmentaldy kıno jáne óner, mádenıet jáne týrızm týraly tanymdyq jobalardan turady.

«Jibek Joly/Silk Way» telearnasynyń basqarýshy dırektory Erkejan Kúntýǵannyń aıtýynsha, túrik tilinde habar taratý – ónimderin qazaq, orys, aǵylshyn, ózbek jáne qyrǵyz tilderinde daıyndaıtyn arnanyń aýdıtorııasyn keńeıtedi.

Telearnanyń efırlik jospary turaqty túrde sapaly ári suranysy joǵary kontentpen tolyqtyrylyp otyrady. Mysaly, bıylǵy qańtarda aǵylshyn tilinde «Reporter With President» baǵdarlamasy jaryqqa shyqty. Onda Memleket basshysynyń Joǵary deńgeıdegi kezdesýleri men kelissózderinen eksklıýzıvti kadrlar kórsetildi.

Buǵan qosa bıyl «Orel ı Reshka. Kazahı» tanymal trevel-shoýynyń jańa maýsymy iske qosyldy. Ol telekanal habar daıyndaıtyn barlyq tilde taratylady.

Telearnanyń resmı saıty: www.silkwaytv.kz

Aıta keteıik, 2002 jyldyń 25 qazanynda telearna «CaspioNet» brendimen (keıinnen «Kazakh TV», «Qazaq TV» rebrendıngterinen keıin) habar tarata bastady. 2017 jyldyń 16 qarashasynda telearna qazaq, orys jáne aǵylshyn tilderindegi aýdıotrekteri bar kóptildi habar taratýǵa kóshti. 2018 jyldyń 1 mamyrynan bastap qyrǵyz tilinde, al sol jyldyń qarashasynda ózbek tilinde habar tarata bastady. 2024 jyldyń 1 mamyrynan bastap túrik tilinde habar taratý bastalady.