Silk Way Star jobasynyń jeńimpazy ánshi Alem-men dýet oryndaǵysy keledi
ASTANA. KAZINFORM — Astanada Azııadaǵy alǵashqy vokaldyq megajoba — Silk Way Star aıaqtaldy. Fınalda erekshe daýysymen kópti tańǵaldyrǵan Mońǵolııadan kelgen Mıshel Djozef jeńimpaz atandy. Ánshi joba jaıly áserimen Jibek Joly arnasynyń «Búgin LIVE» baǵdarlamasynda bólisti.
Mońǵol ártisi baıqaýdan keıin áli óz-ózine kelmegenin aıtyp, mońǵol jáne qazaq kórermenderiniń qoldaýyn erekshe atap ótti.
— Otandastarym jappaı quttyqtap jatyr. «Qara torǵaı» ánin shyrqaǵannan bastap qazaq kórermenderi jyly lebiz bildire bastady. Eń aldymen maǵan daýys berip, qoldaǵan jandarǵa alǵysymdy bildiremin. Álemge tanymal ánshi Dımash Qudaıbergenniń qolynan marapat alýym mereıimdi eseledi, — deıdi ánshi.
Jeńimpaz aldaǵy ýaqytta qazaq tilinde án aıtý josparynda ekenin aıtty.
— Qazaqtyń tili óte baı. Osy tilde án aıtý oıymda bar. Jaqynda maǵan qazaq prodıýseri habarlasty, daýys jazýdy bastaımyz. Aldaǵy ýaqytta qazaq tilinde ánim shyǵady, — deıdi Mıshel Djozef.
Sonymen qatar ol Silk Way Star syılaǵan múmkindikterge toqtaldy.
— Joba — elder arasyndaǵy dostyqtyń kópiri. 12 elden áriptes, dos taptyq. Kollaboratsııa, dýet máselesin talqyladyq. Mysaly, múmkindik bolsa qazaq ánshisi Alem-men birge án aıtsam deımin. Sebebi onyń stıli bólek, áserli, — deıdi ol.
Aıta keteıik, kelesi jyly atalǵan baıqaýdy Qytaı tarapy ótkizedi.