Silk Way Star jobasynyń redaktory sahna syrtyndaǵy qupııalarmen bólisti

ASTANA. KAZINFORM – Silk Way Star tek ádemi shoýǵa qurylǵan joba emes. Sahna syrtynda úlken daıyndyq, qaýyrt tirshilik jatyr. Bul týraly jobanyń shef-redaktory Qasymhan Aldashev Jibek Joly arnasynyń «Búgin LIVE» baǵdarlamasynda aıtty. 

Qasymhan Aldashevtiń aıtýynsha, jobanyń jemisti bolýynda shyǵarmashylyq quramnyń eńbegi jatyr.

– Bastapqyda qatysýshylardan anketa jınaý, beınebaılanys ornatý bári quramǵa úlken júkteme boldy. Ár shyǵarylymnyń josparyn túzdik, stsenarııin talqyladyq. Redaktorlar qaýyrt jumys istedi, keıde kútpegen qıyndyqtar týyndady. Joba barysynda tildik kedergiler de boldy, keıde sheteldik ádilqazylar óz ana tilinde sóılep ketetin. Sol kezde aýdarmashylar dereý aralasyp otyrdy, – deıdi ol.

Shef-redaktor grand-fınaldyń 120 mıllıon aýdıtorııany qalaı jınaǵanyna da toqtaldy. Aıtýynsha, buǵan qatysýshylardyń jan-jaqty qyryn kórsetetin tehnıkalardyń qoldanylýy áser etken.

– Qatysýshylardyń bolmysyn barynsha ashýǵa tyrystyq. Jobanyń kúndeliginde árbiriniń erekshe qyryn kórsettik. Mysaly, qytaılyq qatysýshy Chjan He Sıýan kúmis buıymdardan kollektsııa jınaýdy unatady. Tájikstannan kelgen Fahrıddın Hákimov buryn kásibı sportshy bolǵan, aýyr jaraqattan keıin ónerge bet burǵan. Armenııalyq Saro Gevorgıan buǵan deıin 10 baıqaýda qatarynan jeńiske jetken. Al jeńimpaz Mıshel Djozef el bile bermeıtin ýrtyn dýý tehnıkasymen tanymal. Osyndaı qyzyqty detaldar kóp boldy, biz olardy úzbeı bólisip otyrdyq. Kórermenniń baıqaýdy tapjylmaı qaraǵany da sodan, – dedi Qasymhan Aldashev.

Eske sala keteıik, buǵan deıin Silk Way Star baıqaýynyń fınalynda Ázerbaıjan men Armenııa ókilderiniń arasynda qyzyqty jaǵdaı boldy.