Silk Way Star jobasynyń ózbekstandyq qatysýshysy: Qazaqsha áripterdi úırený qıyn boldy

ASTANA. KAZINFORM — Elordada Silk Way Star – Azııa elderiniń alǵashqy iri vokaldyq baıqaýynyń túsirilimi jalǵasyp jatyr. Baıqaýǵa 12 eldiń talanttary qatysady. Azııa elderi arasyndaǵy mádenı kópirge aınalǵan bul jobada ár qatysýshy óz eliniń mýzykalyq dástúrin, tilin, mádenıetin kórsetedi. Búgin baıqaýǵa qatysýǵa Ózbekstannan kelgen ánshi Madınabaný Ádilova«Jibek joly» telearnasyndaǵy «Búgin LIVE» baǵdarlamasyna suhbat berip, jobanyń qyr-syry týraly áńgimelep berdi.

– Jobanyń mundaı aýqymdy bolaryn kútpedim. Ádette «Jibek joly» degende, kóz aldyma Koreıa, Qytaı jáne bizdiń TMD elderi keletin. Bul baıqaýda Malaızııa men Mońǵolııanyń da ónerpazdary bar. Án tańdaǵanda óz jaılylyǵyma mán berdim, sebebi sahnada bıler men qoıylymdar bolýy múmkin. Tipti osy baıqaýda alǵash ret bıshilermen bıleýge týra keldi. Sosyn árıne, repertýardyń jan-jaqtylyǵyna da qaraımyn. ıAǵnı, únemi bir stılde án shyrqasań, kórermen jalyǵyp ketýi múmkin. Eger birinshi týrda baıaý án bolsa, keleside yrǵaqty án tańdap, ózińdi ártúrli qyrdan kórsetýiń kerek, – deıdi M. Ádilova. 

Ózbekstandyq ánshi qazaq tiliniń aktsentin meńgerý qıynǵa soqqanyn aıtýda. 

– Jalpy ózbek tili jumsaqtaý estiledi, al qazaq tili – sál qatqyl jáne ótkir estiledi. Sondyqtan qazaqsha áripterdi aıtýǵa kóp kúsh salýǵa týra keledi. Bir týrda biz qazaq ánderin ózimizdiń ana tilimizge aýdaryp aıtýymyz kerek boldy. Men Aıqyn Tólepbergenniń jýyrda shyqqan «Súıgenim» ánin tańdadym. Taǵy bir kezeńde – qazaqtyń halyq ánderin aıtýymyz kerek. Onda «Qamajaı» ánin tańdadym, – deıdi ónerpaz. 

Sonymen birge, M. Ádilova qatysýshylar arasyndaǵy atmosfera týraly da aıtyp berdi. 

– Árıne, básekelestik seziledi, bárimiz munda ne úshin kelgenimizdi túsinemiz. Bul halyqaralyq joba, bárimiz fınalǵa ótkimiz keledi. Biraq adamgershilik pen dostyqty umytpaımyz. Men kóbinese Sabına jáne Davranmen (qatysýshylar – red.) jaqsy sóılesemin. Barlyq qatysýshylarmen dostyq qarym-qatynastamyz, keshke jınalyp án aıtamyz, baıqaýdy talqylaımyz, – deıdi ánshi. 

Aıta keteıik, Silk Way Star shoýy 20 qyrkúıekten bastap Silk Way, Jibek Joly, Qytaıdyń CCTV-3 arnasynda jáne qatysýshy elderdiń ulttyq arnalarynda kórsetiledi.

QR Prezıdentiniń Teleradıo Kesheni Prezıdenti men CMG medıakorporatsııasy uıymdastyryp otyrǵan baıqaýǵa 12 el, atap aıtqanda, Ázerbaıjan, Armenııa, Grýzııa, Malaızııa, Qazaqstan, Qytaı, Qyrǵyzstan, Mońǵolııa, Tájikstan, Túrikmenstan, Ózbekstan jáne Ońtústik Koreıa ókilderi qatysady.

«Silk Way Star» baıqaýy birqatar Azııa elinde telearnadan kórsetiledi. 

Onda Qazaqstan atynan ánshi Alem óner kórsetedi.