Mońǵolııa Prezıdenti Astanada ótken Silk Way Star baıqaýynyń jeńimpazyn marapattady
ASTANA. KAZINFORM — Silk Way Star halyqaralyq vokaldyq baıqaýynyń jeńimpazy, Mońǵolııadan shyqqan Mıshel Djozef «Altyn temirqazyq» ordeniniń ıegeri atandy.
Mońǵolııanyń Ulttyq bostandyq pen táýelsizdikti qalpyna keltirý kúniniń 114 jyldyǵyna oraı el Prezıdenti Ýhnaagıın Húrelsúh azamattardy joǵary memlekettik ataq, orden sondaı-aq medaldarmen marapattaý týraly Jarlyq shyǵardy. Marapattalǵandar qatarynda Silk Way Star Azııa halyqaralyq vokaldyq baıqaýynyń Gran-prı ıegeri, ánshi Mıshel Djozef te bar. Ol «Altyn temirqazyq» ordenimen («Altan gadas odon») marapattaldy.
— Prezıdent ordendi tabystaı otyryp: «Altyn temirqazyqtaı jarqyra», dedi. Bul — sózben aıtyp jetkize almaıtyn áser. Halyqaralyq sahnada meniń esimimnen góri, elimniń aty atalǵanyna qatty qýandym. Bul marapat meni odan ári bıik maqsattarǵa umtylyp, jańa jetistikterge jetýge shabyttandyrdy, — dep bólisti Mıshel Djozef.
Mıshel Djozef — Mońǵolııaǵa keńinen tanymal ánshi ári kompozıtor. Ol shyǵarmashylyǵynda dástúrli ýrtyn dýý (sozylmaly halyq ánderi) elementterin pop, R& B jáne fank janrlarymen sheber úılestiredi. Óner ıesi mońǵol jáne aǵylshyn tilderinde án shyrqaıdy.
Silk Way Star — Azııadaǵy alǵashqy halyqaralyq vokaldyq baıqaý. Bul jobaǵa Qazaqstan, Mońǵolııa, Ázerbaıjan, Armenııa, Grýzııa, Malaızııa, Qytaı, Qyrǵyzstan, Tájikstan, Túrikmenstan, Ózbekstan jáne Ońtústik Koreıadan kelgen ónerpazdar qatysty.
Shoý Qazaqstan Respýblıkasy Prezıdentiniń Teleradıokesheni men Qytaıdyń CMG medıa korporatsııasy arasyndaǵy Silk Way Star halyqaralyq jobasyn qurý týraly kelisim aıasynda júzege asyryldy. Baıqaýdyń barlyq 10 shyǵarylymy Jibek Joly jáne Silk Way telearnalarynan kórsetildi. Úlken fınal tikeleı efırde ótip, Ázerbaıjan, Grýzııa, Tájikstan, Qyrǵyzstan jáne Mońǵolııany qosa alǵanda, álemniń kóptegen elderindegi kórermenderdi qamtydy. Jobanyń jalpy kórermender sany 1 mıllıard adamnan asty.
«Altyn temirqazyq» ordeni (Altan Gadas Odon) — 1936 jyly qurylǵan Mońǵolııanyń memlekettik marapaty. Ol eldiń eń joǵary nagradalarynyń biri bolyp sanalady jáne erlik isteri, mádenıet, qoǵam jáne ózge de salalardaǵy aıryqsha eńbegi úshin tabystalady.
Buǵan deıin Mıshel Djozef qazaq tilinde án jazýdy josparlap júrgenin málimdegen edi.
Megajobanyń jeńimpazy týraly tolyǵyraq myna siltemeden oqyńyz.