Silk Way Star: Qazaqstanda mundaı halyqaralyq jobalardyń kóp bolǵany durys - Erbolat Bedelhan

  ASTANA.KAZINFORM- Silk Way Star halyqaralyq telejobasynyń fınalyna oraı qazylar alqasynyń múshesi Erbolat Bedelhan pikir bildirdi.

Onyń aıtýynsha, óner salasynda shekara bolmaıdy, sondyqtan mundaı shyǵarmashylyq jobalardyń Qazaqstanda jıi ótýi mańyzdy.

- Meniń oıymsha, óner ultqa nemese shekaraǵa bólinbeýi tıis. Óner arqyly baılanysý eń durys jol. Jaqynda ǵana Qytaıda boldym, eger 1,5 mlrd halqy bar úlken naryq bizdiń ónerpazdarǵa ashylsa, bul biz úshin tek paıda ákeledi, - dedi ol.

Erbolat Bedelhan fınalǵa shyqqan qatysýshylardyń kásibı deńgeıin joǵary baǵalady.

- Fınalǵa ótkenderdiń barlyǵy óz elderiniń laıyqty ókilderi. Ár adamnyń mýzykalyq talǵamy ártúrli, biraq biz, qazylar, barlyq baǵytty túsinip, jan-jaqty qarastyrýǵa tyrysamyz. Meniń basty maqsatym zamanaýı mýzyka turǵysynan baǵalaý, - dedi ol.

Qazylar alqasynyń múshesi fınalda qatysýshylar kóptegen qyrynan synalatynyn atap ótti.

- Bul fınalda ártister tek sahnalyq obrazben ǵana emes, vokaldyq tehnıkasymen, daýys dıapazonymen jáne oryndaýshylyq sheberligimen baǵalanady. Osy turǵydan alǵanda, tehnıka men dıapazon jaǵynan erekshelengen úsh qatysýshy bar Mıshel, ıAzmın jáne Madınoboný, - dedi Erbolat Bedelhan.

Joba fınalynyń nátıjesi Silk Way Star qatysýshylarynyń kásibı deńgeıin aıqyndap, halyqaralyq mádenı yntymaqtastyqty nyǵaıta túsetini kútiledi.