Silk Way Star: Qazaqstan Eýrazııanyń jańa medıabrendin qalyptastyrady

ASTANA. KAZINFORM – QR Prezıdentiniń Teleradıokesheni Qytaıdyń CMG korporatsııasymen birlesip qurǵan Silk Way Star halyqaralyq vokaldyq baıqaýy eldiń eń tanymal eksporttyq medıa ónimderiniń birine aınaldy. Format tolyqtaı Qazaqstanda ázirlengen, sondyqtan zańdy quqyǵy, franshıza men monetızatsııa áleýeti otandyq ındýstrııaǵa tıesili, bul oǵan jańa múmkindikter ashady.

Bıylǵy jobada Mońǵolııadan kelgen qatysýshy Mıshel Djozef jeńiske jetti. Onyń jeńisi baıqaýdyń halyqaralyq mártebesin jáne aımaqtyń barlyq talanttaryna ashyqtyǵyn taǵy da kórsetti.

Sandar Silk Way Star tanymaldyǵynyń artqanyn rastap otyr. Áleýmettik jelilerde aýdıtorııany qamtýy 43 eldi, 143 mln-nan astam paıdalanýshyny jáne 300 mln-nan astam qaralymdy qurady. Bul Qazaqstan úshin quqyqtar men lıtsenzııalar satýdy, jarnama naryǵyn keńeıtýdi jáne demeýshilik kelisimsharttarynyń kóbeıýin qosa alǵanda, naqty múmkindikter usynady.

Osylaısha, Silk Way Star qazirdiń ózinde eldiń shyǵarmashylyq ındýstrııasyn damytyp, prodaksh-stýdııalar, dızaın, mýzyka, SMM jáne analıtıka mamandaryna degen suranysty arttyryp keledi. Joba sonymen qatar Qazaqstannyń aımaqtaǵy mádenı dıplomatııa ortalyǵy retindegi ımıdjin nyǵaıtyp otyr.

Jobany masshtabtaý Qazaqstanǵa Eýrazııadaǵy jetekshi medıahab retindegi mártebesin nyǵaıtýǵa kómektesedi. BAQ pen shyǵarmashylyq ekonomıkaǵa ınvestıtsııalar aldaǵy jyldary 50-70 mıllıon dollarǵa jetedi, al salanyń JІÓ-ge qosqan úlesi eki esege artady dep boljanyp otyr.