Silk Way Star qatysýshylarynyń qazaqsha ánderin hıtke aınaldyrǵan Baqytjan Byhın kim
ALMATY. KAZINFORM — Áleýmettik jelide qazaqsha án aıtyp turǵan sheteldik oryndaýshylardyń vıdeolary jıi tarap jatqanyn baıqasańyz, munyń artynda kóbine Baqytjan Byhınniń qoltańbasy turady. Ol kásibı mýzykant bolmasa da, TikTok pen Instagram-da qazir trendke aınalǵan mýzykalyq kontenttiń avtoryna aınaldy.
Baqytjan biz stýdııaǵa kirgen sátte jańa ǵana óńdelgen vıdeosyn jelige jarııalap úlgerdi.
Bul — Silk Way Star jobasynyń qatysýshysy Yazmin Aziz oryndaǵan «Súgirdiń termesine» jasaǵan remıksi.
Arada kóp ýaqyt ótpeı-aq, halyqaralyq joba qatysýshysynyń ózi vıdeony kórip, jyly lebizin joldap, remıks úshin alǵys aıtty.
Baqytjan Byhın Narhoz ýnıversıtetinde týrızm mamandyǵynda oqyǵan, biraq stýdent kúninen beri dybys álemine den qoıǵan.
— Mýzykaǵa burynnan qyzyǵamyn. Ýnıversıtette dybys jazatyn stýdııa boldy, sol jerde tájirıbe jınaı bastadym. Mine, 13 jyldan asty. Stýdııama kásibı ánshi de, qarapaıym adamdar da keledi. Ernar Amandyqtyń «Keıipker» deıtin ánin estigen bolarsyz? Dál sol án meniń stýdııamda jazyldy, — deıdi ol.
Ol buǵan deıin tek sahna syrtynda júrgen. Otandyq telearnalardaǵy jobalarǵa qatysyp, tipti reseılik tanymal telejúrgizýshi, ázilkesh Azamat Musaǵalıevpen de jumys istegen.
«Vırýstyq» vıdeodan Silk Way Star-ǵa deıin
Baqytjannyń tanylýy áleýmettik jeliden bastalypty. Ol áýelide trendke aınalǵan ázil, jappaı taraǵan vıdeolardy mýzykamen súıemeldep, óńdep, óz paraqshasyna jarııalaǵan.
Ol jeliden ıdeıa izdep júrip, Silk Way Star jobasynda qytaılyq oryndaýshy Zhang HeXuan-nyń qazaqtyń halyq áni «Júgirip shyqtym beleskeni» oryndaǵan vıdeosyn kózi shalyp qalǵan.
— Alǵashynda TikTok pen Instagram-ǵa jaı ǵana qyzyq vıdeolardy mýzykamen óńdep sala bastadym. Bir kúni Silk Way Star jobasyn kórip qaldym. Ózge elden kelgen qatysýshylar bizdiń ana tilimizde — qazaqsha án aıtyp tur. Bul óte erekshe kórindi, — deıdi Baqytjan.
Osydan keıin ol salmaqty, maǵynaly kontentke de bet burǵan.
— Shetel azamattarynyń qazaqsha án aıtqany erekshe áser syılady. «Nege olardy qoldap jibermeske?» degen oı keldi. Sóıtip, aıtqan ánderin óńdep, óz qoltańbamdy qosyp, kontent jasaı bastadym, — deıdi ol.
Mıllıondaǵan qaralym jáne qazaqsha kontent
Baqytjannyń sózinshe, shetel azamattarynyń qazaqsha án aıtýy — aýdıtorııaǵa ótimdi kontent.
— Bul vıdeolar mıllıondaǵan qaralym jınamaıdy, árıne. Alaıda kishkentaı reaktsııanyń ózi shabyt beredi. Qazir paraqshamda 10 mıllıonnan astam qaralym men birneshe júz myńdaǵan laık jınaǵan vıdeolarym bar, — deıdi avtor.
Baqytjan qazaqsha kontent qarqyn alyp kele jatqan kezeńde óz úlesin dál osylaı qosa alatynyna senedi.
— Óz tilimdi dáripteýge qosar úlesim — osy kontentim, — deıdi ol.
Qarapaıym stýdııa — úlken jobalar
Baqytjannyń stýdııasy qarapaıym ǵana. Munda mıkrofon, monıtor, dybys kolonkasy ǵana bar.
Biraq osy shaǵyn keńistikten birneshe iri joba shyqqan. Al qazir burynǵydaı tek sahna syrtynda emes, eńbegin kópshilik te bile bastaǵan.
— Qazir áleýmettik jelidegi vıdeolarymnan keıin kóshede kórgender «Pıanıno tartatyn jigit emessiń be?» dep tanyp jatady, — deıdi Baqytjan.
Ol kontent jasaýdy burynnan oılap júrgenimen bıyl aqpanda ǵana naqty qolǵa alǵan.
— Aqpanda Instagram-da 9 myń ǵana oqyrmanym boldy. Qazir 10 aıdyń ishinde 100 myńnan asty. TikTok-ta sol kezde paraqsha ashtym, búginde 140 myńnan astam oqyrmanym bar, vıdeolaryma 8 mıllıonnan astam laık basylǵan, — deıdi óńdeýshi.
Baqytjannyń endigi jospary anyq. Ol óz kontenti arqyly halyqaralyq aýdıtorııanyń nazaryn jaýlap, qazaqsha mýzykalyq kontentti jańa deńgeıge shyǵarǵysy keledi.
Aıta keteıik, Silk Way Star jobasynyń grand-fınaly 22 qarashada ótedi jáne saǵat 20:00–de Jibek Joly telearnasynda tikeleı efırde kórsetiledi.
Bir mezgilde habar taratý Qazaqstanda, Ázerbaıjanda, Tájikstanda, Qyrǵyzstanda jáne Mońǵolııada ótedi.
Birinshi azııalyq vokaldyq mega-jobanyń jeńimpazy aralas júıe boıynsha anyqtalady: 50% qazylar alqasy jáne 50% onlaın kórermenderdiń daýys berýi arqyly.
Aıta keteıik, Silk Way Star jobasynyń grand-fınalyna kelesi ártister shyqty:
- ALEM (Qazaqstan);
- ıAzmın Azız (Malaızııa);
- Avtandıl Abeslamıdze (Grýzııa);
- Mıshel Djozef (Mońǵolııa);
- Chjan He Sıýan (Qytaı);
- Saro Gevorgıan (Armenııa);
- Madınaboný Adylova (Ózbekstan).
Siz ózińizdiń súıikti ánshińizdi silkwaystar.org veb-saıtynda qoldaı alasyz.
Silk Way Star Ortalyq Azııadaǵy alǵashqy vokaldyq joba boldy, oǵan 12 elden: Ázerbaıjan, Armenııa, Grýzııa, Qazaqstan, Qytaı, Qyrǵyzstan, Malaızııa, Mońǵolııa, Tájikstan, Túrikmenstan, Ózbekstan jáne Ońtústik Koreıadan kelgen ártister qatysty.
Qatysýshylar arasynda halyqaralyq baıqaýlardyń jeńimpazdary, tanymal ártister jáne tıisti mýzykalyq mektepterdiń kórnekti ókilderi bar.
Joba Qazaqstan Respýblıkasy Prezıdentiniń Teleradıokesheni men China Media Group (CMG) arasyndaǵy kelisim aıasynda júzege asyryldy.
Aıta keteıik, munyń aldynda Silk Way Star eýropalyq sarapshylardy joǵary kásibıligimen tańǵaldyrǵanyn jazǵanbyz.
Sondaı-aq qazaqstandyq ánshi ALEM Silk Way Star-dyń grand-fınalyna daıyndalyp jatqanyn habarlaǵanbyz.
