Silk Way Star qatysýshylaryna arnalǵan laıfhak – Qyrǵyz ánshisiniń tájirıbesi

ASTANA. KAZINFORM – Silk Way Star baıqaýynda qatysýshylardyń ánshilik qabiletimen qatar, harızmasy, kıimi, ózin-ózi ustaýy, tipti dene bitimi de synǵa túsedi. Bul týraly Qyrǵyz elinen kelgen ádilqazylar alqasynyń múshesi Jibek Joly telearnasynyń «Búgin LIVE» baǵdarlamasyna bergen suhbatynda aıtty.

– Silk Way Star baıqaýy, qatelespesem, 2018 jyly alǵash ret bastalǵan edi. Sol kezde bizdiń elimizdiń atynan Omar Janyshov atty myqty vokalıstimiz kelip, bas júldeni jeńip ketken edi. Sol kezde bizdiń halyq ártisimiz Gúlnur Satylǵanova qazylar alqasynyń arasynda otyrǵan. Al osy joly ádilqazylar alqasyna meni múshe qylyp shaqyrǵanyna óte qýanyshtymyn. Bul men úshin úlken jaýapkershilik. Óıtkeni ánshilerge jaı tyńdarman retinde qaraý bir basqa, al olardyń oryndaýyna, harızmasyna, sahnada ózin-ózi ustaýyna baǵa berý – úlken jaýapkershilik, – deıdi Gúljigit Qalyqov.

Qazylar alqasynyń múshesi qatysýshylardy qandaı krıterııler boıynsha baǵalaıtynyna toqtaldy.

– Baıqaýda ánshilik te, harızma da, sahnada ózin-ózi ustaýy da, kıgen kıimi de, qajet bolsa, dene bitimi de óte mańyzdy. Eń áýeli bul – vokaldyq synaq. Baıqaý qatysýshysy jaqsy án aıta alýy kerek. Durys án tańdaý da úlken jaýapkershilik. Adamǵa qaraǵanda, onyń kózinen jan dúnıesin, júzinen sulýlyǵyn kóresiń. Shyǵarmashylyq adam úshin sulý bolý da asa mańyzdy. Men belgili bir eldi synaýdan aýlaqpyn. Biraq sahnadaǵy ártisterdiń ózin-ózi kórsetýine, ónerine, halyqpen, qazylar alqasymen qarym-qatynasyna qaraı baǵa berýge tájirıbem jetedi dep oılaımyn, – deıdi Qyrǵyz Respýblıkasynyń eńbek sińirgen ártisi.

Kóptegen baıqaýlardyń jeńimpazy óziniń laıfhaktarymen bólisti.

– Qatysýshylarǵa sáttilik tilegim keledi. Sebebi kóptegen konkýrstarǵa qatysqandyqtan, munyń qandaı sezim ekenin men jaqsy bilemin. Kishkentaı kezimde bir halyq ártisi sahna syrtynda qobaljyp turǵanymdy kórip: «Gúljigit, sen qaıda án aıtqandy unatasyń?» – dep surady. Men: «Monshada ándi erkin aıta alamyn», – dedim. Sonda ol maǵan: «Sahnaǵa shyq ta, kózińdi jumyp, ózińdi monshada turǵandaı elestet, ózińdi erkin usta», – dedi. Qatysýshylarǵa osy laıfhakty paıdalanyńdar dep aıtqym keledi. Eń bastysy – qatysý, úlken tájirıbe, dostyq. Bul baıqaýǵa óz elderiniń namysyn qorǵap kelýdiń ózi – jeńis, – deıdi stýdııa qonaǵy.

Gúljigit Qalyqov Qyrǵyz Respýblıkasynyń atynan qatysyp jatqan ónerpaz týraly da pikir bildirdi.

– Tamǵa – óte talantty. Óziniń kózqarasy bar. Ártúrli stılde án aıtýdy biletin, kóp jerde beıimdele alatyn qyz. Sońǵy ýaqytta óz elimizdegi úlken sahnalarǵa shyǵyp, ónerin ár taraptan kórsetip jatyr. Tamǵanyń Qyrǵyzstanda óz orny bar. Sondyqtan osy konkýrsta da ónerin, talantyn, qyrǵyz eliniń batyrlyq rýhyn kórsetý kerek dep oılaımyn, – deıdi ol.

Qyrǵyz Respýblıkasynyń eńbek sińirgen ártisi mundaı abyroıly ataqqa qalaı qol jetkizgenin aıtyp berdi.

– Bala kezimnen án aıtyp, sahnaǵa shyǵa bastadym. Túrli baıqaýlarǵa qatysyp, jeńimpaz atandym. Sońǵy qatysqan baıqaýlarymnyń biri – túrki elderi arasynda ótken «Eýrazııa juldyzy» atty joba edi. Onda bas júldeni jeńip aldym. Sodan keıin bizdiń sol kezdegi Prezıdentimizdiń buıryǵymen maǵan «Eńbek sińirgen ártis» degen ataq berildi. Bulaı bolady dep tipti kútpegen de edim. Óıtkeni áli jaspyn, áli talaı qyzmet qylýym kerek. Biraq bul men úshin keremet tosynsyı ári jaýapkershilik boldy, – deıdi ánshi.

Qazylar alqasynyń múshesi ózin eńbek sińirgen ártis qylǵan «Eýrazııa juldyzy» baıqaýynyń erekshelikterine toqtaldy.

– Kóptegen halyqaralyq baıqaýlarǵa qatysqanmyn. Olardyń eń uzaqqa sozylǵany – «Eýrazııa juldyzy» konkýrsy. Joba 2 aı boldy. Qatysýshylardyń bári jınalyp, árbir elde saıahattap shyqqan edik. Qazaqstanǵa da, Túrikmenstanǵa da, Ázerbaıjanǵa da, Kıprǵa da bardyq. Sol elderdiń mádenıetin óz kózimmen kórip, sezindim. Bul baıqaýdyń ereksheligi – jandy orkestrdiń súıemeldeýimen ótti. Sol jerde ár adamnyń ózindik tembrine saı daýystardy rettep, barlyq usaq máselelerdi úılestirip shyqtyq. Bul men úshin úlken tájirıbe boldy. Solaı túrikshe sóıleýdi de úırendik, – deıdi Gúljigit Qalyqov.

Talantty ánshi Silk Way Star jobasy týraly da oıyn jetkizdi.

– Silk Way Star – shyǵarmashylyq úshin úlken tájirıbe. Qatysýshylar úshin serpin beretin joba. Olar ózderiniń júregindegi, oıyndaǵy stıli men áýenin, jan dúnıesin qazirgiden de baıytyp, óz eline shyǵarmashylyq syılaı berýi kerek. Odan bólek, ózderińiz kórip otyrǵandaı, men Qyrǵyzstannan kelip, Qazaqstannyń qutty stýdııasynda otyrmyn. Bul – dostyqty nyǵaıtady. Qatysýshylardy Qazaqstannyń kórikti jerlerine aparyp, kórsetip jatyrsyzdar. Endi ár elden kelgen ánshiler de óz úılerine baryp, Qazaqstannyń qandaı jer ekenin áńgimeleıdi. Bul baıqaýdyń qatysýshylarǵa bereri kóp, – dep túıindedi qazylar alqasynyń múshesi.

Eske sala keteıik, buǵan deıin taǵy bir ádilqazy múshesi, Túrikmenstan opera ánshisi Atajan Berdıev te «JibekJolý» arnasyndaǵy «Búgin LIVE» baǵdarlamasynda Astanadan alǵan áserimen bólisken edi.