SILK WAY STAR qatysýshylary birinen-biri ótedi, baǵa qoıý ońaı bolmaı jatyr — Qazylar alqasynyń múshesi

ASTANA. KAZINFORM – «SILK WAY STAR» halyqaralyq baıqaýy qazylar alqasynyń múshesi, Tájikstannyń Eńbek sińirgen qaıratkeri Parvına Shýhrýllaeva jobaǵa qatysýshylar qandaı krıterııler boıynsha irikteletinin aıtty.

— Bul Astanaǵa alǵash ret kelýim. Meni zamanaýı ári ásem qalalaryńyz tańǵaldyrdy. Jyly qabyldaǵany úshin qazaq halqyna jáne uıymdastyrýshylarǵa alǵys aıtqym keledi. Joba munsha aýqymdy dep kútpegen edik, uıymdastyrýyna óte joǵary deńgeıde. Óz elimniń atynan mundaı baıqaýǵa qatysý men úshin zor mártebe, - dedi ol «Jibek joly» telearnasyndaǵy «Búgin LIVE» baǵdarlamasynda. 

Sondaı-aq ol jobaǵa qazylyq jasaý qıynǵa soǵyp jatqanyn da atap ótti.

— Biz alǵashqy efırdi túsirdik. Qatysýshylardyń ishinen mynaý myqty, mynaý tómen dep baǵalaý qıynǵa soqty, sebebi báriniń deńgeıi joǵary. Vokaly, harızmasy, ártistik qabileti – bári-bári keremet! Búgin ekinshi efırdi túsirip jatyrmyz, ókinishke qaraı baıqaýdyń talaby solaı, endi qatysýshylardy irikteı bastaýymyz kerek. Sáıkesinshe, keıbir qatysýshylar jobamen qoshtasatyn bolady, - dedi Parvına Shýhrýllaeva. 

Odan bólek qatysýshylarǵa negizinen qandaı krıterııler boıynsha bal qoıylatynyn aıtty. 

— Áýeli bul vokaldyq baıqaý ekenin umytpaýymyz kerek. Sondyqtan eń birinshi ánshilerdiń vokaldyq deńgeıine qaraımyz. Biraq ánshi degen kóptegen qasıetti boıyna toǵystyrǵan óner ıesi ǵoı. Onyń ártistigi, sahnada ózin ustaýy, bıge ıkemi – bári de úılesip turýy kerek. Sonyń bárin jalpylaı qoryta kele upaı taǵaıyndaımyz, - dedi tájikstandyq ánshi. 

Aıta keteıik, jobaǵa Tájikstan atynan Fahrıddın Hakımov qatysyp jatyr.