Silk Way Star: qatysýshylar qazaqstandyq hıtterdi 11 tilde oryndady

ASTANA. KAZINFORM — Astanada halyqaralyq Silk Way Star vokaldyq baıqaýy jalǵasyp jatyr. Úshinshi epızod artta qalyp, jobadan taǵy bir qatysýshy shyǵyp, jarys odan ári qyza tústi. Bul týraly Kazinform agenttigi jazdy. 

Osy aptada qatysýshylar kórermenderge erekshe shyǵarmashylyq syı jasady. 11 elden kelgen ánshiler qazaqstandyq hıtterdi ózderiniń ana tilinde oryndady. Mundaı mýzykalyq tájirıbe tyńdarmandardyń erekshe qyzyǵýshylyǵyn týdyryp, tanys ánder jańa ún men reńkte estildi.

Baıqaýdyń úshinshi epızodynda sahnany alǵash bolyp Túrikmenstannan kelgen ánshi Dovran Shammyev ashty. Ol qazaqstandyq ándi oryndaǵannan keıin qazaq pen túrikmen halyqtarynyń rýhanı jaqyndyǵyn erekshe sezingenin aıtty.

— Biz de jylqyny óte jaqsy kóremiz, ásirese aqalteke tuqymyn. Bizdiń elde ony jaı ǵana adamnyń dosy emes, otbasynyń múshesi dep sanaıdy. Sondyqtan Qazaqstanda atqa mingen sátte men osy jerdiń rýhyn, halqyn sezindim jáne olardy júregimmen qabyldadym, — dep bólisti Dovran Shammyev.

Alaıda barlyq qazylar onyń ónerin joǵary baǵalaı qoıǵan joq. Ánshi muny túsinistikpen qabyldap, ár sarapshynyń óz kásibı pikiri bar ekenin atap ótti.

Kelesi bolyp Malaızııadan kelgen ıAzmın Azız sahnaǵa shyqty. Qazaqstandyq hıt onyń oryndaýynda tyń serpinmen estildi. Qazylar alqasy onyń daýysy men sahnadaǵy harızmasyn atap ótti, degenmen keıbiri bul janrdyń oǵan beımálim ekenin aıtty.

— Bul joly ózimdi tolyq kórsete almadym, qazylar pikirimen kelisemin, — dedi ol.

Kórermen zalynda ıAzmınge qoldaý bildirgen jigit te boldy — ol ánshiniń ónerin kórý úshin arnaıy Malaızııadan ushyp kelgen.

Qytaılyq Chjan He Sıýan Qazaq ulttyq óner ýnıversıtetine baryp, joǵary áser alǵanyn aıtty.

— Óz stýdenttik shaǵyma qaıta oralǵandaı boldym. Silk Way Star maǵan osyndaı múmkindik syılady, — dedi ol.

Ánshi áıgili «Tańǵy qala» ánin qytaı tilinde jáne rok-stılde oryndady. Qazylar onyń daýysy men sahnadaǵy erkindigin joǵary baǵalady.

Qyrǵyzstannan kelgen jarqyn oryndaýshy Tamǵa qazaqstandyq ánshi Yenlik-tiń ánin óz tilinde shyrqady.

— Men Yenlik-tiń shyǵarmashylyǵyn jaqsy kóremin, sondyqtan onyń ánin tańdadym. Bul — eki eldiń ónerpazdary arasyndaǵy shyǵarmashylyq baılanys, — dedi ol.

Sonymer qatar sahnada Yenlik pen Tamǵa birge án shyrqap, kórermenniń ystyq yqylasyna bólendi.

Grýzııalyq Avtandıl Abeslamıdze romantıkalyq kompozıtsııa oryndap, tyńdarmanǵa shabyt syılaǵysy keletinin aıtty.

— Qazaq ániniń sózin ózim aýdardym, ol maǵan alǵashqy mahabbatymdy eske saldy, — dedi ánshi.

Qazylar onyń vokaldyq tehnıkasyn jáne sahnadaǵy harızmasyn joǵary baǵalady.

Astanany aralaý barysynda ánshi Ulttyq mýzeıge baryp, ǵaryshkerdiń naǵyz skafandaryn kórgenin erekshe atap ótti.

Ońtústik Koreıalyq K-pop toby Kandis qazaqtyń ulttyq taǵamdaryn tatyp kórip, jergilikti mádenıetpen tanysty. Top músheleriniń biri ázildep:

— Koreıada meni boıshań deıtin, al Qazaqstanda ózimdi kishkentaı sezindim, — dedi.

Sahnada kvartet «Kesh meni» ánin koreı tilinde oryndady. Qazylar alqasy olardyń úılesimdi vokalyn jáne názik mýzykalyq ınterpretatsııasyn joǵary baǵalady.

Ózbekstannan kelgen eń jas qatysýshy Madınaboný Adılova Astanany bıikten tamashalap, daıyndyq arasyndaǵy áserimen bólisti.

— Bul joly ózimdi jan-jaqty ánshi retinde kórsetkim keledi. Ándi ózime arnadym, — dedi ol.

Jas ánshi shyǵarmany ózbek tiline anasymen birge aýdarǵanyn aıtty. Qazylar onyń oryndaýyndaǵy náziktik pen emotsııany erekshe atap ótti.

Grýzııalyq Saro Gevorgıan qazaqtyń ulttyq shapanyn kıip, ulttyq naqyshqa qyzyǵýshylyǵyn bildirdi. Onyń mahabbat taqyrybyndaǵy áni zalda otyrǵan kórermenniń de, qazylardyń da kóńilin tolqytty.

Mońǵolııalyq Mıshel Djozef úshin qazaq ánin óz tilinde oryndaý jańa tájirıbe boldy. Ol mátindi ózi aýdaryp, óz stılin saqtaýǵa tyrysqan.

— Men barlyq sheteldikti Astanaǵa kelýge shaqyrǵym keledi. Munda bári zamanaýı, ádemi ári erekshe, — dedi ánshi.

Ol Jibek Joly telearnasynyń stýdııasynda bolyp, robottandyrylǵan kameralardy kórip tańdanysyn jasyrmady.

Tájikstandyq Fahrıddın Hakımov Ulttyq mýzeıge baryp, Uly Jibek jolynyń tarıhymen tanysty.

— Meniń týǵan qalam Istaravshan da osy joldyń boıynda ornalasqan. Buryn saýda baılanystyrǵan jol búginde bizdi mýzyka men mádenıet arqyly biriktirip otyr, — dedi ol.

Onyń áserli oryndaýy qazylardy da sahnaǵa shyǵaryp, bı bıleýge jeteledi. Ánshi kórermenniń suraýymen ánin bıs retinde qaıta oryndady.
Qazylar alqasy olar tek vokaldy ǵana emes, ártistiń sahnadaǵy jalpy óner kórsetýin baǵalaıtyndaryn atap ótti.

Óz kezegine qazaqstandyq oryndaýshy ALEM (Batyrhan Malıkov) ózine tán erekshe stılde «Qaıda» ánin oryndap, joǵary baǵaǵa ıe boldy.
Úshinshi epızod qorytyndysy boıynsha eń kóp upaı jınaǵandar — ALEM (Qazaqstan) jáne Kandis (Ońtústik Koreıa).

Jalpy úsh epızodtyń nátıjesinde jobada kóshbasshylyqty qazaqstandyq ALEM saqtap keledi, al Túrikmenstan ókili Dovran Shammyev jobamen qosh aıtysty.

Silk Way Star — Azııadaǵy alǵashqy halyqaralyq vokaldyq joba. Baıqaýǵa 12 eldiń ókilderi qatysýda: Ázerbaıjan, Armenııa, Grýzııa, Qazaqstan, Qytaı, Qyrǵyzstan, Malaızııa, Mońǵolııa, Tájikstan, Túrikmenstan, Ózbekstan jáne Ońtústik Koreıa.

Jobanyń jańa epızodtary ár senbi kúni saǵat 20:00–de Jibek Joly telearnasynda kórsetiledi.

Buǵan deıin Silk Way Star halyqaralyq vokaldyq baıqaýynyń úshinshi epızodynan keıingi nátıjeler belgili bolǵanyn jazǵanbyz.