Silk Way Star jobasynyń ekinshi maýsymy Qytaıdyń Iý qalasynda bastaldy
ASTANA. KAZINFORM – Qytaıdyń Iý qalasynda qazaqstandyq Silk Way Star halyqaralyq vokaldyq shoýynyń ekinshi maýsymynyń túsirilimi resmı túrde bastaldy. Aýqymdy televızııalyq joba Uly Jibek joly boıyndaǵy elderdiń ónerpazdary men kórermenderin biriktiredi, dep habarlaıdy Kazinform.
Iý qalasynda ótken resmı rásimde sóz sóılegen «Jibek Joly/Silk Way» telearnasynyń basqarýshy dırektory Erkejan Kúntýǵan 2025 jylǵy maýsymda Qazaqstan Prezıdenti Qasym-Jomart Toqaev pen QHR Tóraǵasy Sı Tszınpın osy jobany júzege asyrý týraly kelisimge qol qoıǵanyn atap ótti.
– Prezıdent Qasym-Jomart Toqaev bizdiń jobamyzdy «zamanaýı mádenı dıplomatııanyń úlgisi» dep atady. Shyǵarmashylyq pen talant arqyly biz halyqtarymyz arasyndaǵy ózara túsinistik pen dostyqty nyǵaıtamyz. Silk Way Star jobasynyń basty mıssııasy da osynda, – dedi Erkejan Kúntýǵan.
QR Prezıdentiniń Teleradıokesheni men Qytaıdyń CMG Medıakorporatsııasy birlesip júzege asyryp jatqan jobanyń ekinshi maýsymy eki el arasyndaǵy mádenı-gýmanıtarlyq jáne medıa salasyndaǵy yntymaqtastyqtyń jańa kezeńine jol ashady.
Iý qalasyndaǵy bir sahnada álemniń 12 elinen kelgen jetekshi vokalıster óner kórsetedi. Olar – Qazaqstan, Qytaı, Qyrǵyzstan, Reseı, Vetnam, Malaızııa, Túrkııa, Serbııa, Ońtústik Afrıka Respýblıkasy, Jańa Zelandııa, Brazılııa jáne Grýzııa ókilderi. Qazaqstan atynan ánshi Rýhııa Baıdúkenova qatysady.
Ekinshi maýsymnyń formaty da jańartylǵan. 10 shyǵarylym boıy barlyq qatysýshy jobada óner kórsetýin jalǵastyrady, al jeńimpaz jınaǵan upaılardyń jalpy nátıjesi boıynsha anyqtalady.
Mundaı format kórermenderge árbir oryndaýshyny, onyń vokaldyq ereksheligin jáne ózi tanystyratyn eldiń mádenıetin tereńirek tanýǵa múmkindik beredi.
Aıta keteıik, Prezıdent Silk Way Star-dyń sheteldegi elimizdiń eń tanymal ári bedeldi medıajobalarynyń birine aınalǵanyn jetkizdi.
