SILK WAY STAR halyqaralyq baıqaýy: Qazaqstan atynan ánshi Alem óner kórsetetin boldy
ASTANA. KAZINFORM — Jýyrda Astanada bastalatyn SILK WAY STAR halyqaralyq vokaldyq baıqaýynda Qazaqstan namysyn ánshi ALEM (Málik Batyrhan) qorǵaıtyn boldy. Bul týraly aıtýly óner dodasyna qatysty ótken baspasóz konferentsııasynda málim boldy.
— Bul úlken jaýapkershilik. Men jalpy baıqaýlarǵa qatyspaǵaly kóp boldy jáne sahnada toppen óner kórsetip júrgennen keıin baıqaýǵa qatysýdy da umytyp qalyppyn. Sondyqtanda usynys túskende, árıne, qanshalyqty bul jobada ózimdi kórsete alamyn dep kóp oılandym. Biraq qýana-qýana qabyl aldym, óıtkeni bul men úshin kók Týymyzdy álemdik arenada jelbiretý úlken mártebe. Osy múmkindik úshin kóp-kóp rahmet! Men barymdy salyp, jeńiske jetýge tyrysamyn, — dedi jas ánshi.
Sondaı-aq ol jobada ár epızodta taqyryp ózgerip otyratynyn jáne baıqaý talabyna saı ol málimetterdi ashyp aıta almaıtynyn atap ótti.
Aıta keteıik, baıqaýdyń túsirilimi 20 tamyzda bastalady. Al fınaldyq saıys 22 qarashada «Jibek joly/Silk Way» telearnasynda jáne baıqaýǵa qatysýshy elderdiń bas telearnalarynda kórsetiledi.
Qazaqstan Respýblıkasy Prezıdentiniń Teleradıo Kesheni Prezıdenti men CMG medıakorporatsııasy uıymdastyryp otyrǵan baıqaýǵa 12 el, atap aıtqanda, Ázerbaıjan, Armenııa, Grýzııa, Malaızııa, Qazaqstan, Qytaı, Qyrǵyzstan, Mońǵolııa, Tájikstan, Túrikmenstan, Ózbekstan jáne Ońtústik Koreıa ókilderi qatysady.