Silk Way Star: Grand-fınalda súıikti ánshińizge qalaı daýys bere alasyz

ASTANA. KAZINFORM — Silk Way Star baıqaýynyń jeńimpazy aralas júıe boıynsha anyqtalady: 50% qazylar alqasy jáne 50% onlaın kórermenderdiń daýys berýi arqyly.

Shoýdyń daýys berý erejeleri «Evrovıdenıe» sııaqty halyqaralyq baıqaýlar mysalyna negizdelgen, bul barlyq qatysýshylar úshin maksımaldy ashyqtyq pen obektıvtilikti qamtamasyz etedi. 

Kórermenderdiń qatysýshylar úshin daýys berýi jobanyń resmı saıtynda: silkwaystar.org saıtynda, 22 qarashada saǵat 20:00–de Jibek Joly TV arnasyndaǵy fınaldyń tikeleı efırinde ótedi.

Kórermenderge daýys berý tártibi: 

1-qadam: qatysýshyǵa daýys berý úshin shoý kezinde teledıdar ekranynda kórsetilgen QR kodyn smartfonyńyz arqyly skanerleńiz. QR-kod sizdi daýys berýdiń resmı saıtyna baǵyttaıdy.

2-qadam: Baıqaý saıtyna ótkennen keıin baıqaý qatysýshylary elderiniń týlaryn kóresiz. Siz ózińizge unaıtyn qatysýshyny tańdap, ony 0-den 12-ge deıingi shkala boıynsha baǵalaı alasyz. Saıtta óz elińizdiń qatysýshysynan basqa barlyq fınalısterdiń jumysyn baǵalaı alasyz.

MAŃYZDY! Daýys berý erejelerine sáıkes, kórermender óz elin tanystyratyn qatysýshyǵa daýys bere almaıdy! Bul ereje baǵalaýdyń obektıvtiligi men beıtaraptyǵyn qamtamasyz etýge arnalǵan. 

Daýys berý tek tikeleı efır kezinde ǵana múmkin, onyń bastalýy men aıaqtalýyn baıqaý júrgizýshileri habarlaıdy.

Eske sala ketsek, jobanyń fınalısteri qataryna kelesi ánshiler kirdi:

— ALEM (Qazaqstan);

— ıAzmın Azız (Malaızııa);

— Avtandıl Abeslamıdze (Grýzııa);

— Mıshel Djozef (Mońǵolııa);

— Chjan He Sıýan (Qytaı);

— Saro Gevorgıan (Armenııa);

— Madınaboný Adylova (Ózbekstan).

«Silk Way Star» jobasy Qazaqstan Respýblıkasy Prezıdentiniń Teleradıokesheni men China Media Group (CMG) arasyndaǵy kelisim aıasynda júzege asyrylyp otyr.

Jobada Qazaqstannyń namysyn qorǵap júrgen belgili ánshi Alem eksklıýzıv suhbat bergen edi.