«Silk Way Star» — franshıza emes, otandyq mamandardyń medıa ónimi — Erkejan Kúntýǵan

ASTANA. KAZINFORM — Astanada ótetin Azııa elderi arasyndaǵy «Silk Way Star» halyqaralyq baıqaýy jobaǵa qatysýshy elderdiń bas telearnalarynan kórsetiledi. Bul týraly óner dodasynyń bastalýyna oraı «Qazmedıa ortalyǵy» stýdııasynda ótken baspasóz máslıhatynda aıtyldy.

— Bul eshqandaı franshıza emes, qazaqstandyq mamandardyń oılap tapqan jobasy. Ózderińiz bilesizder, elimizde kóptegen telearnalarda kórsetiletin iri mýzykalyq halyqaralyq shoýlar — shet elderdiń franshıza ónimderi. Bul baıqaýǵa 12 elden qatysýshylar keledi. Bıyl maýsym aıynda QR Prezıdentiniń Teleradıokesheni men Qytaı Medıa korporatsııasy (CMG) «Silk Way Star» halyqaralyq jobasy týraly kelisimge qol qoıǵan bolatyn. Sol kelisimge oraı, jobany kúzgi maýsymǵa daıyndap jatyrmyz, — dedi «Jibek Joly/Silk Way» telearnasynyń basqarýshy dırektory Erkejan Kúntýǵan. 

Spıkerdiń aıtýynsha, qazirge deıin 80-nen astam ótinim kelip túsken. Uıymdastyrýshylar solardyń ishinen eń myqty 12 ánshini iriktep alǵan. 

— Olar óz elderinde aýdıtorııa jınaǵan óte tanymal ánshiler. Tipti Eurovision-ge qatysqan ánshiler keledi. Bul keıin jyl saıyn ótetin jobaǵa aınalatynyna senemiz. Bul baıqaý Qytaıdyń Ortalyq telearnasynan kórsetiledi. Qazaqstandyq ónimniń sheteldik telearnadan kórsetilýi — otandyq medıa mamandardyń eńbeginiń jemisi. Bizdiń sapa, bizdiń dáreje sheteldik kórermenniń kóńilinen shyǵady degen oıdamyz, — dedi Erkejan Kúntýǵan.

Aıta keteıik, buǵan deıin Azııa memleketteri arasynda alǵash uıymdastyrylǵan mýzykalyq baıqaý Astanada ótetinin jazǵan edik. 

«Silk Way Star» baıqaýy birqatar Azııa elinde telearnadan kórsetiledi.

Onda Qazaqstan atynan ánshi Alem óner kórsetetin boldy.