Silk Way Star fınalyn 120 mln kórermen tamashalady — Erkejan Kúntýǵan
ASTANA. KAZINFORM — Jibek Joly telearnasynyń basqarýshy dırektory Erkejan Kúntýǵan OKQ alańynda Silk Way Star jobasynyń fınalyna qatysty negizgi málimetterdi jarııalady.
Onyń aıtýynsha, bıyl halyqaralyq qazylar alqasynyń baǵalary men kórermender daýys berýiniń jıyntyq nátıjeleri usynyldy. Daýys berýge túrli elderden 508 287 adam qatysqan. Bul — aımaqtaǵy vokaldyq telejobalar úshin eń joǵary kórsetkishterdiń biri jáne baıqaýǵa degen halyqaralyq qyzyǵýshylyqtyń aıqyn dáleli.
Erkejan Kúntýǵan fınal nátıjeleri aralas júıe boıynsha anyqtalǵanyn atap ótti: 50% — kórermen daýysy, 50% — qazylar alqasynyń baǵasy.
— Silk Way Star Azııanyń mádenı alýan túrliligin toǵystyrǵan biregeı alańǵa aınaldy. Joba mýzyka elder arasyndaǵy ózara túsinistikti tereńdetip, dıalogqa múmkindik beretinin kórsetti. Kórermenderdiń belsendiligi óńirde halyqaralyq formattarǵa degen qyzyǵýshylyqtyń joǵary ekenin dáleldeıdi, — dedi ol.
Ol kórermender daýys berýiniń qorytyndysyn da jarııalady.
— Mıshel Djozef (Mońǵolııa) — 112 241 daýys, Madınaboný Adylova (Ózbekstan) — 85 443, Chjan He Sıýan (Qytaı) — 73 662, ıAzmın Azız (Malaızııa) — 73 609, Saro Gevorgıan (Armenııa) — 73 160, Avtandıl Abeslamıdze (Grýzııa) — 46 027, ALEM (Qazaqstan) — 32 145, — dep atap ótti Erkejan Kúntýǵan.
Erkejan Kúntýǵannyń málimetinshe, barlyǵy 43 eldiń kórermenderi daýys bergen. Eń kóp daýys Qazaqstan, Qytaı, Mońǵolııa, AQSh, Reseı, Túrkııa, Germanııa, Sıngapýr, Indonezııa, Ózbekstan, Grýzııa jáne Malaızııadan túsken.
Sonymen qatar ol jobanyń fınaly Qazaqstanda Jibek Joly telearnasynda tikeleı efırde kórsetilgenin, al Qyrǵyzstan, Ázerbaıjan, Tájikstan jáne Mońǵolııada seriktes arnalar arqyly parallel efır uıymdastyrylǵanyn aıtty.
Erkejan Kúntýǵannyń aıtýynsha, fınaldy álem boıynsha TV men strımıngtik servısterde shamamen 120 mln kórermen tamashalaǵan.
Eske salsaq, keshe Astanada «Silk Way Star» halyqaralyq jobasynyń grand-fınaly máresine jetip, Mıshel Djozef (Mońǵolııa) jobanyń jeńimpazy atandy.
Budan buryn Kazinform elordada ótken «Silk Way Star» vokaldyq mega-jobasynyń grand-fınalynan fotoreportaj usyndy.