Silk Way Star eýropalyq sarapshylardy joǵary kásibıligimen tańǵaldyrdy
ASTANA.KAZINFORM - Silk Way Star baıqaýy aımaqtan tys jerlerde de kórermen nazaryna ilikti. Eýropalyq sarapshylar jobanyń daıyndyq sapasy men mádenı mańyzyn joǵary baǵalap jatyr, - dep habarlaıdy Kazinform menshikti tilshisi.
Belgııalyq dızaıner Elena Van Harıtonova shoýdyń formaty aýqymy men kórsetilimi boıynsha eýropalyq sahnalardy eske túsiretinin atap ótti.
- Men 12 elden kelgen qatysýshylardyń óneri men obrazyn, júrgizýshilerdiń obrazyn qazylar alqasynyń obrazyn túgel qarap shyqtym. Qyzyqty sátter óte kóp. Jas qatysýshylardyń etnodınamıkany, zamanaýı hıp-hop pen klassıkalyq motıvterdi óz obrazdarynda, sahnalyq kostıýmderinde qalaı úılestire alǵanyn baıqadym, - dedi ol.
Onyń aıtýynsha, shoýdyń keıbir elementteri «Evrovıdenıe» atmosferasyn eske túsiredi.
- Men sondaı-aq Ortalyq Azııa men búkil Jibek jolynda áıgili bolǵan altyn keste úlgisin kórip turmyn. Máselen, júrgizýshiler sondaı kostıým úlgisin tańdaǵan. Túster men jaryqtandyrý da óte áserli, - degen baǵa berdi dızaıner.
Sarapshy qatysýshylardyń talanty men kúsh-jigerin joǵary baǵalap, olardy «óz elderiniń jarqyn jáne shynaıy ókilderi» ekenin aıtty.
Buǵan deıin Silk Way Star án baıqaýynyń fınalısteri anyqtalǵanyn habarlaǵan edik.