Silk way star — dostyq pen tájirıbe alańy
ASTANA. KAXINFORM — Silk Way Star jobasy jalǵasyp jatyr. 12 eldiń qatysýshysyn bir arnaǵa toǵystyrǵan baıqaýdyń ár kúni qyzyqty ótýde. Silk Way Star — tek qana óner alamany emes, ol dostyq pen izgilikti dáripteıtin alań. Osy rette baıqaýdyń ádilqazy múshesi, Túrikmenstan opera ánshisi Atajan Berdıev «JibekJolý» arnasyndaǵy «BúginLive» baǵdarlamasynda Astanada alǵan áserimen bólisti.
— Qazaqstan — óte qonaqjaı halyq. Tipti bul eldiń qonaqjaılylyǵy adamdarynyń ózgege degen qarym-qatynasynan-aq baıqalady. Al, halyqaralyq jobaǵa keletin bolsaq, men bul jerde ádilqazy retinde alǵash ret qatysyp otyrmyn. Alǵan áserim erekshe. Sebebi, bul jerge tórtkúl dúnıeniń túkpir-túkpirinen eń talantty jastar jınalǵan. Meniń bir baıqaǵanym, Silk Way Star tek synaq alańy emes, munda dostyqtyń lebi seziledi, — deıdi mártebeli meıman.
Biraq, jobaǵa kórermen bolý men qazylyq etý eki bólek dúnıe. Halyqaralyq deńgeıdegi joba qatysýshylaryna qara qyldy qaq jaryp ádil baǵa berý qıyn jumys, — deıdi ol. Sebebi, Astanaǵa alystan at terletip kelgen ár qatysýshy jeńimipaz bolýǵa laıyqty.
— Ádilqazy bolý bul — jaýapkershiligi mol sharýa. Sebebi, ár qatysýshynyń ózine tán talanty men harızmasy bar. daýystary men tańdaǵan baǵyttary da ártúrli. Sondyqtan men úshin olarǵa baǵa berý óte qıyn. Bizdiń bergen baǵadan qatysýshynyń bolashaq taǵdyry sheshiledi. Eshkimniń kóńilin qaldyrǵym kelmeıdi. Biraq, saıystyń talaby solaı. Erejesi bar. Jeńimpaz tek bireý ǵana bolýy kerek, — dedi Atajan Berdıev.
Aıtpaqshy, ónerpazdar jaqynda ǵana Astana qalasynda ekskýrsııa jasap, bir-birimen dostyq qarym-qatynasyn nyǵaıta tústi. Shahardyń kórikti jerlerin aralap, qazaq halqynyń mádenıetimen tanysty. Tanysyp qana qoımaı, tonyń tarıhyna tereń boılady. Qatysýshylar alǵan áserin sózben jetkizý múmkin emes ekenin jasyrmady.
— Munda qonaqjaılylyq óte keremet. Adamdary maǵan qatty unady. Ásirese Astananyń ǵımarattary men arhıtektýralyq týyndylary erekshe. Sondaı-aq, mádneı muralary da tańdaı qaqtyrmaı qoımady. Eger menen Qazaqstan týraly pikirińiz qandaı dese, birden bas barmaǵymdy kórsetip baǵa beretin edim, — deıdi qatysýshylardyń biri.
Aıta keteıik, bul jobany Qazaqstan Respýblıkasy Prezıdentiniń Teleradıokesheni men Qytaıdyń CMG medıakorporatsııasy birlesip júzege asyryp otyr. Al, Halyqaralyq Silk Way Star jobasy 20 qyrkúıekten bastap «JibekJolý» arnasynda kórermenge jol tartady.