Silk Way Star birden 12 elge tanylýǵa múmkindik beredi — ádilqazy múshesi Samıra Efendı
ASTANA. KAZINFORM — Astanada Azııa elderiniń alǵashqy iri vokaldyq baıqaýy — Silk Way Star jobasynyń túsirilimi jalǵasyp jatyr. Baıqaýǵa 12 eldiń talanttary qatysyp jatyr. Bul joba tek mýzykalyq saıys emes, Azııa elderi arasyndaǵy mádenı kópir. Ár qatysýshy óz eliniń mýzykasyn, dástúrin, tilin, mádenıetin álemge tanytady. Jobanyń ádil qazy múshesi, ázerbaıjandyq tanymal ánshi Samıra Efendı Jibek Joly telearnasyndaǵy «Bugin Live» baǵdarlamasynda suhbat berdi.
Onyń aıtýynsha, qazylyq etý — oryndaýshylyqtan múlde bólek, jaýapkershiligi joǵary ári qıyn mindet.
— Bul meniń Qazaqstanǵa alǵash kelýim emes, 2017 jyly Almatyda ótken alǵashqy Silk Way Star baıqaýyna qatysqanmyn. Osy joly uıymdastyrýshylar tarapynan ádilqazy retinde shaqyrtý alǵanymda tańqaldym. Bul men úshin jańa ári kúrdeli tájirıbe. Qatysýshylardy baǵalaý — olardyń shyǵarmashylyq taǵdyryn sheshetin úlken jaýapkershilik. Sondyqtan óz bilimim men tájirıbemdi tolyq qoldanýǵa tyrysyp jatyrmyn, — dedi Samıra Efendı.
Ázerbaıjandyq qonaq baıqaýda ár qatysýshynyń vokaldyq deńgeıi, harızmasy, sahnamen jáne kórermenmen baılanysy, horeografııasy, mýzykalyq talǵamy, tipti stıli men obrazdary erekshe nazarǵa alynatynyn atap ótti.
— Barlyq 12 qatysýshy óz erekshelikterimen este qaldy. Barlyǵynyń daýys dıapazony jaqsy, ózderiniń jeke stıli bar. Degenmen, olar áli jas, tájirıbeleri azdaý. Biraq ýaqyt óte kele olardyń úlken juldyzdarǵa aınalatynyna senemin. Qatysýshylarǵa ózine senim artyp, qandaı jaǵdaıda da alǵa qoıǵan maqsattan taımaýǵa keńes aıtamyn. Baǵa men oryn mańyzdy emes, eń bastysy — úzdiksiz damý, óz-ózińmen jumys isteýdi toqtatpaý, — deıdi ánshi.
S. Efendı mundaı aýqymdy baıqaýlar jas oryndaýshylar úshin tanymal bolýǵa jol ashatyn úlken múmkindik ekenin de aıtady.
— Qatysýshylardy birden 12 eldiń kórermeni tanı bastaıdy. Jańa tanystar, tyń aýdıtorııa paıda bolady, úlken tájirıbe jınaqtalady. Men osyndaı halyqaralyq jobalar kóbeıse eken deımin. Bul — bolashaq úlken sahnalarǵa aparatyn mańyzdy baspaldaq, — dedi Samıra Efendı.
Aıta keteıik, Silk Way Star shoýy 20 qyrkúıekten bastap Silk Way, Jibek Joly, Qytaıdyń CCTV-3 arnasynda jáne qatysýshy elderdiń ulttyq arnalarynda kórsetiledi.
QR Prezıdentiniń Teleradıo Kesheni Prezıdenti men CMG medıakorporatsııasy uıymdastyryp otyrǵan baıqaýǵa 12 el, atap aıtqanda, Ázerbaıjan, Armenııa, Grýzııa, Malaızııa, Qazaqstan, Qytaı, Qyrǵyzstan, Mońǵolııa, Tájikstan, Túrikmenstan, Ózbekstan jáne Ońtústik Koreıa ókilderi qatysady.
«Silk Way Star» baıqaýy birqatar Azııa elinde telearnadan kórsetiledi
Onda Qazaqstan atynan ánshi Alem óner kórsetedi.