Silk Way Star baıqaýynyń alǵashqy kezeńinde Malaızııa ánshisi top jardy
ASTANA. KAZINFORM — Búgin «Jibek Joly» arnasynda «Silk Way Star» halyqaralyq vokaldyq baıqaýynyń alǵashqy shyǵarylymy kórermenge jol tartty, dep habarlaıdy Kazinform tilshisi.
Joba Qytaı, Malaızııa, Ońtústik Koreıa, Qyrǵyzstan, Ózbekstan, Ázerbaıjan, Armenııa, Grýzııa, Qazaqstan, Mońǵolııa, Tájikstan jáne Túrikmenstannan kelgen talantty ártisterdi bir sahnada toǵystyrdy.
Búgin baıqaý qatysýshylary óz repertýarlarynan ana tilderinde án shyrqady jáne óz elderin tanystyrdy. Alǵashqy shyǵarylymda eshbir qatysýshy jarystan shyǵarylmaıdy, barlyǵy kelesi kezeńge joldama aldy.
Qazaqstan atynan sahnada tanymal vokalıst Batyrhan Málikov (Alem) óner kórsetip, hıtke aınalǵan «Kuiim» ánin oryndady. Alǵashqy kezeń nátıjesi boıynsha B. Málikov 7-orynda tur.
Qazylar alqasynyń baǵalaýynsha, bul kezeńde malaızııalyq ánshi Yazmin Aziz 126 upaımen kósh bastap tur. Ekinshi orynda ózbekstandyq Madınaboný Ádilova (122), úshinshi jáne tórtinshi orynda — 120 upaımen túrikmenstandyq Dovran Shammyev jáne grýzııalyq Avtandıl Abeslamıdze tur.
Besinshi jáne altynshy orynda 114 upaı alǵan Chjan Hesıýan qyrǵyzstandyq rep oryndaýshy Tamga men qytaılyq Chjan Hesıýan tur.
Jetinshi orynda — qazaqstandyq Batyrhan Málikov, segizinshi jáne toǵyzynshy orynda — 106 upaı alǵan tájikstandyq Fahrıddın Hakımov pen armenııalyq Saro Gevorgıan bar.
Onynshy jáne on birinshi oryndardy — 104 upaı alǵan mońǵolııalyq Mıshel Djozef pen ázerbaıjandyq Sabına Zade ıelendi.
Eń sońǵy on ekinshi oryn ázirge Kandis dep atalatyn ońtústikkoreıalyq R& B/neo-soýl/hıp-hop tobynda. Olar 92 upaı aldy.
Aıta keteıik, Silk Way Star mega jobasy 12 eldiń telearnasynan birdeı kórsetiledi. Silk Way Star qazirdiń ózinde «Eýrazııanyń jańa mádenı brendi» atanyp otyr. Joba jyldyń eń jarqyn mýzykalyq oqıǵalarynyń birine aınalady dep kútilýde.
Jeńimpazdy barlyq qatysýshy elderden quralǵan halyqaralyq qazylar alqasy anyqtaıdy. Oǵan SILK WAY STAR erekshe ataǵy berilip, ónerin jahandyq sahnada tanytý múmkindigi usynylady. Shoýdyń fınaly 22 qarashada halyqaralyq translıatsııamen tikeleı efır formatynda ótedi.
Baıqaý formatynda 10 baǵdarlama josparlanǵan, al jeńimpaz 50% — qazylar sheshimi, 50% — kórermenderdiń onlaın daýys berý nátıjesinde anyqtalady. Jobany 1 mlrd-tan astam kórermen tamashalaıdy dep boljanyp otyr.