Silk Way Star baıqaýyna daıyndalyp úlgermedim — Qyrǵyz qatysýshysy
ASTANA. KAZINFORM — Qyrǵyz ánshisi qazaqstandyq repermen birge jańa týyndyny jaryqqa shyǵarmaq. Bul týraly Silk Way Star jobasyna Qyrǵyz Respýblıkasynyń atynan qatysyp jatqan Tamǵa habarlady.
— Bul jobaǵa kútpegen jerden qatystym. Maǵan deıin Qyrǵyzstannyń atynan basqa ánshi qatysatyn bolypty. Biraq ýaqyt jaqyndaǵanda josparlary ózgerip, men keldim. Bul men úshin erekshe syılyq. Astanamen jaqynyraq tanysyp, basqa da 12 ólkeden kelgen qatysýshylarmen dostyq qarym-qatynas quratynyma senemin, — deıdi ánshi Jibek Joly telearnasynyń «Búgin LIVE» baǵdarlamasyna bergen suhbatynda.
Qyrǵyzstandyq qatysýshy halyqaralyq baıqaýǵa nebári eki kún daıyndalyp úlgergenin aıtty.
— Shynyn aıtsam, men daıyndalyp úlgermedim. Ánderdi tańdap, az ǵana ázirlenýge bir-eki kún ǵana ýaqyt boldy. Negizinen meni Qyrǵyzstanda myqty mýzykant-reper retinde tanıdy. Alǵashqy áıel reperlerdiń qataryna kiremin. Biraq bul synaqta ártis retinde ártúrli tustaryńdy kórsetýiń kerek. Sol úshin basyn reppen bastadym. Qazir qyrǵyz shyǵarmalaryndaǵy kúshti týyndylardy shyrqap jatyrmyn. Qyrǵyzdardyń áýen yrǵaqtaryn, maqamyn, qomyzdyń únin, Manas eposynan alynǵan motıvterdi de halyqqa kórsetkim keledi, — deıdi Tamǵa.
Ánshi baıqaýdaǵy eń basty syılyq — halyqtardyń dostyǵy ekenin de atap ótti.
— Áýel bastan-aq bul baıqaýda men dostyqty ǵana baǵalaımyn degen ustanymmen kelgenmin. Odan keıin ǵana synaqtyń erejeleri men ádilqazylardyń baǵalaryna mán beremin. Baıqaý bolǵan soń túrli nárse bolyp turady ǵoı. Biraq dostyq — birinshi orynda. Sahna syrtynda biz barlyq qatysýshymen jaqsy qarym-qatynastamyz. Bir-birimizge járdemdesip, tartynbaı sóılesemiz. Bárimizdiń de ustanymymyz bir bolǵannan keıin, bir-birimizdi únemi qoldap júrýimiz kerek dep oılaımyn, — deıdi stýdııa qonaǵy.
Qazaqstan men Qyrǵyz eliniń ónerpazdary eki eldiń yntymaǵyn taǵy bir ret dáleldep, tyńdarmandardy jaqynda jańa týyndymen qýantpaq.
— Bul synaqqa kelgen árbir ánshi jańa dúnıelermen tanysyp, shyǵarmashylyǵyn damytýdy jáne túrli ulttardyń mýzykalyq mádenıetimen tanysýdy armandap keledi dep oılaımyn. Sondyqtan qazir qatysýshylarmen jaqsy kelisimder jasap jatyrmyz. Bul baıqaýda men Eńlik atty ánshimen tanystym. Ony 3-4 jyl buryn Qyrǵyzstanda júrgende tanyp, sóıleskim kelip júrgen. Silk Way Star bizge osy múmkindikti berdi. Qazir kelisim jasap jatyrmyz. Múmkin, jaqyn arada jańa mýzykamen, «qazaq-qyrǵyz bir týǵan» dep tyńdarmandardy qýantarmyz, — deıdi qyrǵyzstandyq ártis.
Stýdııa qonaǵy Silk Way Star baıqaýy týraly oıymen bólisti.
— Buǵan deıin de kóptegen vokaldyq synaqtarǵa qatysyp júrmin. Halyqaralyq baıqaýlarda da baq synaǵanmyn. Biraq mundaǵy baıqaýdyń kólemi úlken. Myqty daıyndyq jasalǵan, ártisterdi jan-jaqty qoldap jatyr. Mundaı masshtabtaǵy kúshti básekege alǵash ret kelýim. Bul joba — men úshin óz-ózimdi synaý. Qyrǵyzstannyń atyn ózge ólkelerge tanytý — úlken jaýapkershilik. Osy atty arqalap kelgenim úshin maqtanamyn. Jáne óz elimdi jaqsy jaǵynan kórsetkim keledi. Árıne, bul shyǵarmashylyǵyma da oń áserin tıgizetini belgili. Osy baıqaýda ózimnen kásibı túrde, buǵan deıin jasaǵan eńbegimniń qandaı deńgeıge jetkenin surap, esep berdim, — deıdi Tamǵa.
Aıta keteıik, buǵan deıin Qyrǵyz Respýblıkasynan kelgen qazylar alqasynyń múshesi Tamǵaǵa sáttilik tilep, laıfhaktarymen bólisken edi.