«Silk Way Star» baıqaýy birqatar Azııa elinde telearnadan kórsetiledi

ASTANA. KAZINFORM — Astanada ótetin Azııa elderi arasyndaǵy «Silk Way Star» halyqaralyq baıqaýy jobaǵa qatysýshy elderdiń bas telearnalarynan kórsetiledi. Bul týraly óner dodasynyń bastalýyna oraı «Qazmedıa ortalyǵy» stýdııasynda ótken baspasóz máslıhatynda aıtyldy.

— Ár elde sol eldiń tilinde kórsetiledi. Mysaly bizdiń elde alǵashqy kezeń 20 qyrkúıek kúni efırge shyǵady. Sodan keıin ol Qytaıda qytaı tilinde kórsetiledi. Ortalyq Azııa elderiniń telearnasynda sol óz elderiniń tilderinde kórsetiledi, — deıdi «Jibek Joly/Silk Way» telearnasynyń basqarýshy dırektory Erkejan Kúntýǵan. 

Sondaı-aq spıker 12 elden keletin qatysýshylar men jıýrılerdiń óz elderinde tanymal juldyzdar jáne aıtýly mamandar ekenin atap ótti. 

— Olar óz elderinde ataqty halyq ártisteri, mýzykalyq prodıýsserler, tanymal tulǵalar. Solardyń báriniń talaptaryn eskere otyryp, joba joǵary deńgeıde uıymdastyrylyp jatyr, — dedi Erkejan Kúntýǵan.

Odan bólek ol baıqaýdyń kelesi jyly Qytaı Halyq Respýblıkasynda ótetinin aıtty. Al odan keıingi jyldary bul baıqaýdy ótkizýge ózge de Azııa elderi usynys jasasa, olarǵa baıqaýdy ótkizý múmkindigin berýge esh kedergi joǵyn atap ótti.

Aıta keteıik, buǵan deıin Azııa memleketteri arasynda alǵash uıymdastyrylǵan mýzykalyq baıqaý Astanada ótetinin jazǵan edik.