«Silk Way Star» — Azııa mýzykasynyń úni
ASTANA. KAZINFORM — «Silk Way Star» — Azııa memleketteri arasynda alǵash uıymdastyrylǵan mýzykalyq baıqaý Astanada ótedi. Bul týraly halyqaralyq jobanyń bastalýyna oraı «Qazmedıa ortalyǵy» stýdııasynda ótken baspasóz máslıhatynda belgili boldy.
Joba Qazaqstan Respýblıkasy Prezıdentiniń Teleradıokesheni men Qytaıdyń CMG medıakorporatsııasy arasyndaǵy halyqaralyq «Silk Way Star» jobasyn qurý týraly kelisim aıasynda júzege asady.
Atalǵan kelisimge 2025 jyly 16 maýsymda QHR Tóraǵasy Sı Tszınpınniń Astanaǵa resmı sapary barysynda, Qazaqstan Prezıdenti Qasym-Jomart Toqaev jáne Qytaı kóshbasshysynyń qatysýymen qol qoıylǵan bolatyn.
Baıqaýǵa 12 el, atap aıtqanda, Ázerbaıjan, Armenııa, Grýzııa, Malaızııa, Qazaqstan, Qytaı, Qyrǵyzstan, Mońǵolııa, Tájikstan, Túrikmenstan, Ózbekstan jáne Ońtústik Koreıa ókilderi qatysady.
Mýzykalyq saıystyń túsirilimi 2025 jylǵy 20 tamyzda bastalady. Grand-fınal 22 — qarasha kúni «Jibek Joly/Silk Way» telearnasynda jáne baıqaýǵa qatysýshy elderdiń jetekshi telearnalarynda tikeleı efırde kórsetiledi.
Vokaldyq baıqaýǵa qatysýshylar qatarynda tanymal ártistermen qatar, jańa esimder de bar:
-
Chjan Hesıýan – Qytaı, «Jańa er ánshi» premııasynyń laýreaty, The Voice of China jobasynyń qatysýshysy;
-
Tamga – Qyrǵyzstan, rep jáne R&B oryndaýshysy, «Maıda» hıtiniń avtory;
-
Fahrıddın Hakımov – Tájikstan, Reseı daýysy ("Golos") jáne X-Factor Belarýs jobalarynyń qatysýshysy;
-
Saro Gevorgıan – Armenııa, Jańa tolqyn 2021 baıqaýynyń jeńimpazy;
-
Sabına Zade – Ázerbaıjan, ánshi ári aktrısa, "Ázerbaıjan daýysy" jobasynyń jartylaı fınalısi;
-
Madınaboný Adylova – Ózbekstan, djaz ansamblderiniń solısi, halyqaralyq baıqaýlardyń laýreaty;
-
Kandis – Ońtústik Koreıa, áıelderden quralǵan R&B/neo-soýl/hıp-hop toby, Playground albomynyń avtorlary;
-
Avtandıl Abeslamıdze – Grýzııa, X Factor Georgia men Voice of Astana jobalarynyń jeńimpazy;
-
Dovran Shammyev – Túrikmenstan, ánshi ári kompozıtor, «Altyn Asyr» syılyǵynyń laýreaty;
-
Mıshel Djozef – Mońǵolııa, Dulaan Baina jáne Bundan Ulaan klıpteriniń avtory;
-
Yazmin Aziz – Malaızııa, halyqaralyq baıqaýlardyń laýreaty, Mobile Legends oıynyna arnalǵan Kita Rockstar ánuranynyń avtory;
-
ALEM (Batyrhan Malıkov) – Qazaqstan, ánshi jáne kompozıtor, Ninety One tobynyń múshesi, "Qazaqstan daýysy" jobasynyń fınalısi jáne X-Factor jartylaı fınalısi.
SILK WAY STAR baıqaýynyń saltanatty grand-fınaly halyqaralyq translıatsııamen live-show formatynda ótedi. Bul jyldaǵy eń jarqyn mýzykalyq oqıǵalardyń birine aınalmaq. Jeńimpazǵa SILK WAY STAR erekshe ataǵy berilip, ónerin jahandyq sahnada tanytý múmkindigi usynylady.
— Bul biz úshin jańa tájirıbe. Mundaı aýqymdy jobany uıymdastyrý men ótkizý úlken eńbekti, tyń sheshimder men kózqarasty talap etedi. Osy oraıda bizdiń shyǵarmashylyq toptyń kreatıvtiligi, tabandylyǵymen qatar erekshe qulshynysyn atap ótý kerek. «Jibek Joly» men «CMG» medıakorporatsııasyn biriktiretin osy jobanyń jemisti bolaryna senim zor. Sonymen qatar álemniń túkpir-túkpirinen jınalatyn, mádenıettiń, beıbitshiliktiń, mýzykanyń, ulttyq rýh men dástúrdiń elshisindeı talantty ónerpazdarǵa biregeı alań usynyp otyrǵanymyzǵa qýanyshtymyz. Mıllıondaǵan kórermenimizdi tyń jańalyqtar jáne álemniń túkpir-túkpirinde turatyn jandardyń bir alańda uıysqanyn tamashalaıtyn ǵajaıyp sátter kútip tur. Biz dostyqtyń altyn kópirin ornatyp, mádenıet arqyly túrli ult pen elderdi jaqyndastyratyn mańyzdy mıssııa atqaryp otyrmyz, — dedi, «Jibek Joly/Silk Way» telearnasynyń basqarýshy dırektory Erkejan Kúntýǵan.
«Silk Way Star» — álemdik mýzykalyq ındýstrııadaǵy jarqyn qubylys bolmaq ári Uly Jibek joly boıyndaǵy elder men halyqtardyń mádenı qundylyqtaryn pash etedi. Baıqaýǵa qatysýshylar ár eldiń mádenıetine tán mýzykalyq stılderdiń alýandyǵyn, dástúrlerdiń, áýender men oryndaý máneriniń ereksheligin kórsetedi.
Qazylar alqasynyń quramynda — tanymal ártister, kompozıtorlar, prodıýserler men medıa ókilderi bar.
«Silk Way Star» — azııalyq mýzykany nasıhattaý, halyqtar arasyndaǵy mádenı baılanysty nyǵaıtý jáne jańa talanttarǵa jol ashatyn alań qalyptastyrýǵa baǵyttalǵan biregeı joba bolmaq.