Silk Way Star: mádenıet pen sheberlik, stıl men daýys bir arnaǵa toǵysqan alań
ASTANA. KAZINFORM — Astana jarqyn emotsııa, mádenı birlik jáne úlken shyǵarmashylyqtyń ortalyǵyna aınaldy. Elordada ótken «Silk Way Star» vokaldyq mega-jobasynyń grand-fınalynda mońǵol ánshisi Mıshel Djozef jeńiske jetti.
Baıqaý bastalmaı turyp tikeleı efırde fınaldyń atmosferasy baıqalyp turdy.
Kórermen qyzyl kilemmen júrip ótken baıqaýǵa qatysýshylardy, halyqaralyq qazylar alqasyn, BAQ ókilderi men kesh qonaǵy bolǵan qazaqstandyq ónerpazdardy qarsy aldy.
Keshtiń arnaıy qonaǵy bolǵan qazaqstandyq ánshi Dımash Qudaıbergen shyqqan sátte kórermen erekshe qoshemetin bildirip, qarsy aldy.
Resmı bólim Qazaqstan Prezıdenti Qasym-Jomart Toqaevtyń quttyqtaýymen ashyldy. Ony Qazaqstan Respýblıkasynyń Memlekettik keńesshisi Erlan Qarın oqydy.
Memleket basshysy quttyqtaý sózinde Silk Way Star — Azııa elderi arasyndaǵy rýhanı ózara is-qımyldy damytýǵa jáne halyqtar arasyndaǵy dostyqty nyǵaıtýǵa baǵyttalǵan biregeı bastama ekeni basa aıtyldy.
Bul sózder birtutas, mádenıetaralyq jáne shyǵarmashylyq keshtiń reńin keltirdi. Olardy zaldaǵy qonaqtar ǵana emes, sahnaǵa shyǵýǵa daıyndalyp jatqan sahna syrtyndaǵy qatysýshylar da zor yqylaspen qabyldady.
Alǵashqy áýen bastalǵan kezde vokalıster óz fınaldyq oryndaýlaryn kórsetý úshin sahnaǵa kezegimen shyqty.
Fınalda Malaızııa, Grýzııa, Qytaı, Armenııa, Mońǵolııa, Ózbekstan jáne Qazaqstan ókilderi óner kórsetti.
Olardyń árqaısysy shyǵarmany ana tilinde oryndap, óz halqynyń salt-dástúri, ártúrli stıli, mádenı kodtary arqyly sahnany saıahat alańyna aınaldyrdy.
Qoıylymdar sahnada óte áserli kórindi: jaryqtar dál qoıylǵan, kórinister men beıneler aıqyn kórindi, al árbir nómerge Qazaqstannyń stılısteri arnaıy daıyndaǵan obrazdary qoldanyldy.
Bul kezde sahnanyń artynda jumys qyzyp jatty. Stılıster árleý jumystaryn jasap, horeografter qysqasha nusqaýlar berdi. Fınalısterdiń jaqyndary oryndaýshylardan beter tolqydy. Degenmen árbir qoıylymdy kórermen zor qoshemetpen qarsy aldy.
Qazaqstannyń halyq ártisi Dımash Qudaıbergen jeńimpazdyń esimin jarııalaǵanda kórermenniń erekshe qoshemetine bólendi.
Syılyqty tapsyrý úshin sahnaǵa Qazaqstan Respýblıkasy Prezıdentiniń teleradıokesheniniń seriktesi, CMG Eýrazııalyq bıýrosynyń jetekshisi Van Delý men Qazaqstan Respýblıkasy Prezıdenti teleradıokesheniniń bas dırektory Raýshan Qajybaeva shyqty.
Silk Way Star — aýqymdy halyqaralyq kúsh-jigerdiń shyńy. Daıyndyqqa qazaqstandyq vokal jattyqtyrýshylary, horeografter, rejısserler, stılıster jáne tehnıkalyq qyzmetkerler atsalysty.
Fınalda sahnanyń syrtynda jobanyń úlken tobynyń árbir múshesi ártisterdiń ónerine, kórneki kórinisterge jáne joǵary sapaly dybysqa basa nazar aýdardy. Osy kúshtiń arqasynda aqtyq máre áserli, ári este qalarlyqtaı ótti.
Jeńimpazdar 50% qazylar alqasynyń, 50% kórermenniń onlaın daýys berýi arqyly anyqtaldy.
Grand-fınaldyń tikeleı translıatsııasyn «Jibek Joly» telearnasy júrgizdi. Sondaı-aq habarlar Ázerbaıjan, Tájikstan, Qyrǵyzstan jáne Mońǵolııada tarady.
Silk Way Star mádenıet, stıl, daýys jáne shyǵarmashylyq toǵysqan keńistikke aınaldy. Dúnıe júzindegi mıllıondaǵan kórermen jobany baqylap, ár eldiń mýzykalyq murasyn tanydy. Jobany bir mıllıard kórermen tamashalady.
Aıta keteıik, keshe Astanada «Silk Way Star» halyqaralyq jobasynyń grand-fınaly máresine jetip, mańǵol ánshisi Mıshel Djozef jobanyń jeńimpazy atandy.
