Silicium Qazaqstan kompanııasy óndiristi iske qosatyn bolsa, elektr qýatyn jetkizý týraly jańa kelisimshart jasaýǵa múmkindigi bar - EAS Qazaqstan energııa óndirýshi kompanııalarynyń prezıdenti
ALMATY. Maýsymnyń 21-i. QazAqparat /Erlik Erjanuly/ - Silicium Qazaqstan kompanııasy óz mindettemesin oryndamaǵan soń biz elektr qýatyn jetkizý týraly kelisimshartty toqtatýǵa májbúr boldyq.
Bul jaıly EAS Qazaqstan energııa óndirýshi kompanııalarynyń prezıdenti Mamythan Sálibekov ótken aptada Óskemende buqaralyq aqparat quraldarynyń ókilderi úshin uıymdastyrylǵan baspasóz-týr kezinde aıtty.
«Biz Silicium Qazaqstan kompanııasymen 2006 jyly 10 jylǵa kelisimshart jasaǵanbyz. Kelisim boıynsha olar 2007 jylǵy shildeniń 1-inen bastap elektr energııasyn alýy kerek edi. 2008 jyly shildeniń 1-inde olarǵa óz óndiristi iske qosý týraly talap qoıǵan bolatynbyz. Kelissóz nátıjesiz aıaqtalǵan soń 2009 jyl kelisimsharttyń kúshin joıýǵa májbúr boldyq», deıdi Mamythan Sálibekov. EAS Qazaqstan energııa óndirýshi kompanııalary prezıdentiniń aıtýynsha, Silicium Qazaqstan áli kúnge deıin óndiristi iske qosa almaı otyr. Eger elektr qýatyna muqtajdyq týyndap jatsa olar basqa kez kelgen kásiporyn sııaqty jańa kelisimshart jasaýǵa tolyq múmkindigi bar.
Jalpy jylyna 25 myń tonna metallýrgııalyq kremnıı óndiredi dep josparlanǵan Qaraǵandydaǵy bul óndiris orny «Qazaqstannyń 30 korporatıvti kóshbasshysy» baǵdarlamasyna enedi. 2008 jyly jeltoqsannyń 9-y kúni onyń iske qosylý rásimine Elbasy da qatysqan bolatyn. Alaıda óndirilgen ónimge naryqta suranys bolmaǵan soń ondaǵy jumys úderisi áli kúnge deıin toqtap tur. Indýstrııa jáne saýda mınıstri Áset Isekeshev aqpan aıynda jumys saparymen Qaraǵandyda bolǵan kezde Silicium Qazaqstan kompanııasynyń bas dırektory Aleksandr Sýtıagınskıı qazir barlyq másele óndiristi elektr qýatymen qamtamasyz etýde bolyp tur dep málimdegen edi. Al oblys ákimi Serik Ahmetov maýsym aıynda kásiporyn qaıta iske qosylatynyn jáne ony elektrmen qamtamasyz etý máselesin sheshýge Indýstrııa jáne saýda mınıstrliginiń aralasýyn suraǵan edi.
