Sileýsinniń ózimen birdeı balyq aýlaǵan sáti vıdeoǵa túsip qaldy

ASTANA. QazAqparat - AQSh ulttyq saıabaqtarynyń birinde jıren sileýsin ózimen birdeı úlken balyqty aýlady. Reındjerler oqıǵany vıdeoǵa túsirip úlgerdi.

«Olımpık» ulttyq saıabaǵy (Olympic National Park) Olımpık túbeginde, Vashıngton shtatynyń soltústik-batysynda ornalasqan. Túbektiń uzaq merzim boıy oqshaýlanýynan munda ózindik flora men faýna qalyptasty. Onda jıren sileýsin Lynx rufus tirshilik etedi. Bul mysyq tuqymdas jyrtqysh qoıan, qoı, qustar, balyqtar, tipti kishigirim akýlalarǵa deıin aýlap, kún kóredi, dep jazdy nat-geo.ru.

Kúzde «Olımpık» saıabaǵynda aqserkeniń ýyldyryq shashý naýqany bastalady. Reındjer Lı Snýk (Lee Snook) áriptesterimen birge balyqtardyń jappaı toptasqan oryndaryn kórýge attandy. Parktiń bir buryshynda jemtigin torýyldaǵan jas sileýsindi baıqaǵan reındjer dereý kamerasyn qosady. Osylaısha, balyq aýlaý oqıǵasyn taspaǵa túsirip alǵan.