Sılvestr Stallone men Djek Nıkolson Golovkınniń boksyn tamashalaıdy
ASTANA. QazAqparat - Gollıvýd juldyzdary qazaqstandyq Gennadıı Golovkın men meksıkandyq Marko Antonıo Rýbıo arasynda 18 qazan kúni Karsonda (AQSh, Kalıfornııa shtaty) ótetin kezdesýdi tamashalaýǵa nıetti. Bul týraly VKontakte áleýmettik jelisindegi GGG resmı tobynyń paraqshasynda habarlanǵan.
«Kalıfornııada ótetin judyryqtasý tek jankúıerler arasynda ǵana emes, Gollıvýd juldyzdarynyń arasynda da zor qyzyǵýshylyq týdyrdy. Senbi kúngi kezdesýdi kórýge tanymal akterler Sılvestr Stallone, Denzel Vashıngton men Djek Nıkolson baratyny belgili boldy», - delingen taratylǵan aqparatta. Eske sala keteıik, WBA (Super) jáne IBO nusqalary boıynsha chempıon Gennadıı Golovkın men WBC-tyń ýaqytsha chempıony arasyndaǵy kezdesýdi HBO men KazSport telearnalary tikeleı efırde kórsetedi. Translıatsııa 19 qazanda Astana ýaqyty boıynsha saǵat 7-ler shamasynda bastalady.
