«Sıqyrly kilt» qazaqstandyq mýltfılminiń tusaýy kesildi

QYZYLORDA. QazAqparat - «Qazaqstannyń 100 jańa esimi» jobasynyń jeńimpazy Symbat Ábdirahmanova «Sıqyrly kilt» tanymdyq-fantastıkalyq mýltfılmin jasap shyǵardy. «Jibek joly» oıyn-saýyq ortalyǵynda atalmysh týyndynyń tusaýy kesilip, kórermen  nazaryna usynyldy, dep habarlaıdy QazAqparat tilshisi.

«Sıqyrly kilt» mýltfılmi Qyzylordanyń 200 jyldyq mereıtoıyna arnalyp ázirlengen. Anımatsııalyq týyndy qalanyń tarıhy men kórikti jerlerinen syr shertedi. Onda búldirshinder Syr elinde dúnıege kelgen ataqty tulǵalardyń ómiri men qyzmetinen mol maǵlumat ala alady. Osylaısha mýlfılmdi ázirlegen mamandar balalarǵa týǵan ólkeniń erekshelikterin aıryqsha tásilmen jetkizedi.

«Sıqyrly kilt» mýltfılmin efırge ázirleýge avtordyń 6 aı ýaqyty ketken. Jumys protsesine tarıhshylar men úzdik pedagogtar da tartylǵan. Tanymal ártister týyndy keıipkerlerin dybystap, óz obrazdaryn sátti oryndap shyqqan.

«Mýltfılmdi ólketaný baǵytyndaǵy árbir sabaqta paıdalanýǵa bolady. «Bilim Foundation» qoǵamdyq qory demeýshilik jasap, bizdiń bastamamyzǵa qoldaý bildirdi. Buryn biz qysqa qazaqsha mýltfılmderdi jasap kelgen bolatynbyz. «Sıqyrly kilt» - bul tolyqmetrajdy taqyryptyq dúnıe bolyp shyqty. Kórermenderdiń kóńilinen shyqqanyna qýanyshtymyz. Aldaǵy ýaqytta da aýqymdy josparlarymyz bar», - dedi anımatsııalyq fılmniń avtory Symbat Ábdirahmanova.