Sıyr eti kartop retinde eksporttaldy degen aqparat jalǵan — Aıdarbek Saparov

ASTANA. KAZINFORM — Áleýmettik jelilerde eksportqa shekteý qoıylǵanyna qaramastan, sıyr eti shetelge kartop retinde shyǵarylady degen aqparat taraǵan. QR Aýyl sharýashylyǵy mınıstri Aıdarbek Saparov bul málimettiń shyndyqqa sáıkes kelmeıtinin habarlady.

Mınıstrdiń aıtýynsha, Veterınarııalyq baqylaý jáne qadaǵalaý komıteti eksporttyq aǵyndardy turaqty túrde qadaǵalap otyr.

— Kartop tıelgen vagondardan et tabyldy degen naqty derek tirkelgen joq. Bul — jalǵan aqparat, — dedi Aıdarbek Saparov Qazaqstan Úkimeti otyrysynyń qorytyndysy boıynsha ótken baspasóz konferentsııasynda.

Onyń sózinshe, kartop tasymaldanatyn vagondarǵa et tıeý tehnıkalyq jáne sanıtarlyq talaptarǵa sáıkes kelmeıdi. Et ónimderi arnaıy temperatýralyq rejımdi qajet etedi jáne temirjol arqyly tek arnaıy sýytqysh vagondarmen jetkiziledi.

Sonymen qatar mınıstr qujatsyz shekaradan ótpek bolǵan júk kóliginiń anyqtalǵanyn málimdedi. Tekserý barysynda tıisti qujattar rásimdelip, kináli tulǵalarǵa zańnamaǵa sáıkes ákimshilik shara qoldanylǵan.

Aıdarbek Saparov zańsyz tasymaldyń aldyn alý baǵytyndaǵy baqylaý jumystary kúsheıtilgenin jáne jalǵan aqparattyń taralýyna jol berilmeıtinin atap ótti.

Aıta keteıik, buǵan deıin elimizde shıkizattyq emes eksport úlesiniń artqany týraly jazǵan edik.